Drumkorps

Beatrix' Drum & Bugle Corps oet Hilversum tiedns de Europese Finales van 2007

de Cavaliers Drum & Bugle Corps oet Rosemont, Illinois tiedns de wearldfinales van 2004

n Drum & Bugle Corps (meestieds of ekortt tot Drumcorps) is n groep marsjeernde muzikaantn (te vergeliekn met nen showband) den at besteet oet kopperbloazers, slagwoarkers en vlagnmeakns.
Disse bands beent t bekeandst en meest verspreaid in Amerika en Kannada, mear t is ook oawer eweeid noar (deeln van) Europa en Azië.
Drumkorpsn beent organisasies dee at neet oet beent op finansjele weenst, en doot met an wedstriedn, optochn, festivals en aandere publieke angeleagnheedn. Vuur de Amerikaanse topkorpsn is dr, ofhaankelik van n boond woer at ze lid van beent, ne leaftiedsbeteuning, woerduur de leedn aait tusken de 14 - 22 joar mut wean, mear aandere boondn loatt ook jonger en eulder too. Boetn Amerika is dr gin leaftiedbeteuning.

Westriedkorpsn doot zommerdaagns met in toern duur Amerika, laanks alle grote Drumcorpswedstriedn. Wedstriedn wordt eheuldn op Amerikaans voetbalveeldn, en wordt beoordeeld op t Algehele Plaatjen (General Effect), Visuele Oetvoerige (Visual Performance) en Muzikale Oetvoerige (Musical Performance), woervuur n antal peuntn wörd toobedeeld, en dee at met mekoar dan t totale peuntnantal bepoalt.

De korpsn studeert alle joarn in de zommermoandn ne nieje show in, den at tusken de 8 en 12 minuutn doert, en den at ze gedoernde t zommerseizoen verbettert en anskoarpt. Zonnen kleainn show hef as vuurdeel det de leedn mear tied en kaans hebt um zwöardere dinge an te learn, woerduur t geheel oetlöp op ne topprestasie, met t heugtepeunt in de finalewekke, an t eande van t seizoen. Zovölle tied is ook wal neudig, want aanders redt ze t neet op zon hoog nivo. Verskeaidene korpsn hebt verskeaidene muziekstieln an enömn tot öar haandelsmoark, en aandern doot alle joarn wat aanders. Geleefde stieln beent simfonies, jazz / big band, popmuziek, muziek van bekeande theaterstukke, en Latiens-Amerikaans.
Korpsn dee at slim völle an wedstriedn doot, beent vake wal 8 tot 10 wekke op toer, woerbie tot wal 12 uur op n dag oefenn gin apartigheaid is. Aandere korpsn loatt de leedn wat mear vriej um ook wat boetn drumcorps wat vrieje tied te hebn. Ook beent r nog korpsn dee at helemoal neet an wedstriedn met doot, umdet ze as doel hebt mear n soort van muziekskole vuur de jeugnd te wean, of as leefhebberieje vuur oold-topkorpsleedn.

Geskiedenisse

Drum en Bugle korpsn komt noar vuurtn oet de Amerikaanse militaire geskiedenisse, aanders dan aandere marsjeernde muziekkorpssoortn. Juust noa n Eerstn Wearldoorlog tot noa 1970, wördn korpsn aait bekostigd duur de VFW en t Amerikaanse Legioen (beaide Amerikaanse veteraannboondn). Hierumme eesktn disse bekostigers det t n militairn groondslag har. Zo um en noabie de joarn '60, woln völ korpsn mear kreatieve vrieheaid en bettere kostndekking van öare sponsors. Aandern veundn det t priezngeeld det ze oet wedstriedn kreegn, zo weinig was det t feailik de möaite neet was um nog met te doon. Doar köm nog bie det ze veundn det de toewmoalige maneern van beoordeeln de kreatieve en muzikale meugelikheedn dee indamn. Op t heugtepeunt van t toewmoalige drumkorpsgebuurn (mear as doezend korpsn oawer heel Amerika) besleutn n antal korpsn met mekoar nen eegn boond op te richtn, wat oetköm op t in leawn roopn van de Drum Corps Associates (drumkorpsgenootn) in 1965 en Drum Corps International in 1972. Um dee tied warn völle korpsn öare bekostigers al kwiet.

De korpsn dee at oawer bleewn, mosn vearder van hoes um bie t daalnde antal wedstriedn bie te wean, wat nog zwöarder was vuur öare kas en tied, en vuur öare leedn persoonlik. Te gelieker tied wördn de kostn vuur de veeldshows al heuger umdet doar mear andacht vuur köm, en doarbie wör de vroage noar bettere lesn en kreatieve inbreng zo hoge det völ wedstriedskorpsn op t gat kömn. In 1990 warn dr nog mear n poar van de eerste oolde drumkorpsn oawer, mear oonderwiel warn dr wal nen hoop niejn bie ekömn, dee at t rechtevoort nog aait good doot.

Ook de tradisjonele, neet-wedstriedgerichte korpsn (mangs verkeerd "alumni korps" eneumd) maakn nen duurstart in de joarn '80, en beent nog aait goans. Disse korpsn beent onmeundig wies met t in eare hooldn van tradisies, en doot met opzet neet met an moderne verniejiges.

Umdet ze zik neet mear an de oolde richtlienn van de 60er joarn hoowdn te hooldn, begunn de korpsn nieje bedeanksels too te pasn, zo as t gebroek van bloasinstrumeantn (horns) met meardere ventieln, oeteenloopnde snelheedn in muziek, neet makkelik te maakn showvörme, oetgebreaidere kostuums van de vlagnmeaks (ook wal bekeand as kluurnwacht of Engels: color guard), en t gebroek van stilstoand orkestslagwoark. Sommige leu meant det drumcorps de leste tied te völle op nen marching band lik, terwiel at dee beaide geliek op beent egoan in de ontwikkeling. t Grötste verskil zit um in de woarheaid det drumcorps allene bloasinstrumeantn met n beker noar vuurtn hebt. Ook is t belangriekste seizoen vuur drumcorps in t zommer, met eerste oefendoatums al in oktober van t vurige joar, terwiel at t seizoen van n marching band in t noajoar is. t Programma (show en muziek) van topkorpsn is meestieds völle moeiliker as det van marching bands, umdet leedn van drumcorps niks doot boetn t korps, en vake duur nen slim zwoarn selektieserie goat (audities).

Muziek

muzieklieste

Ne show dreeit meesttieds um één stiel of thema, of dut verskeaidene duur mekoar. De meeste topkorpsn beent r slim organiseerd in ewördn, en hebt meesttieds neet n poar lösse nommers achter mekaander, mear loatt alns an mekoar skriewn duur spesjaal in ehuurde meziekskriewers, woerbie t thema, t verhaal achter de muziek, ne grote rolle spölt.
Vake, en vuural as t korps muziek van klassieke skrievers gebrok, wörd r vuur ekeuzn um juust meardere woarkn van den persoon te gebroekn as thema. Feailik is alns wat an te pasn is vuur dit soort korpsn al wal es espölt. De leste joarn wörd t al gebroekeliker vuur korpsn um totaal nieje muziek spesjaal vuur t korps te loatn skriewn.

Wat opbouw angeet hebt alle shows n zelfde verloop: eerst keump n Lösmaker (n opener). Dit is t eerste nommer van de show en is bedoold um n andach van t volk te trekn. Doernoa is t korps vrie um te kiezn wodöanig of ze t vearder doot, mear dr beent wal veardere vaste peuntn. Vake is dr in ne show wal ne ballade te veendn as röstpeunt, en aandere ellemeantn dee at n korps as kenmoark hebt. Dit haank of van wolange of n stuk doert. Ook heurt hier de "teunmomeantn" (solo's of features) van verskeaidene oonderdeeln van t korps bie in. Doarnoa wörd ne show of eslötn met ne "Ofsloeting" (closer), wat t heugtepeunt van de show mut wean. t Doel is um op disse manere n oetbalanseerd programma te kriegn met n verskeaidn antal snelheedn in de muziek, momeantn um te loatn zeen wat t korps allemoal wal neet kan.

Instrumeantn

Bloazers

Contra-riege van de Brigadiers Drum & Bugle Corps oet 2007

Ene van de meest kenmoarknde elemeantn an drumkorps is t gebroek van eankel bloasinstrumeantn met n beker noar vuurtn. Met de joarn is t drumkorpsgebuurn versköawn van recht ventielleuze bugels, noar moderne bloasinstrumeantn met meardere ventieln. Hierduur beent de bugels van vroger neet mear neudig en in gin eankel drumkorps terugge te veendn. Tradisjoneel hadn drumkorpsn de instrumeantn in G-stemmige, mear rechtevoort magnt ze ook aandere stemmiges gebroekn. De bloasinstrumeantn dee at in drumkorps gebroekt wordt, beent, van hoge noar lege soprano's (feailik trompetn), Mellofoons, Baritons en/of Eufoniums, en Contrabasbugels (aait of ekortt tot contra).

Al disse instrumeantn köant in meardere stemmiges vuurkomn, mear de meest gebroekte beent G, Bb en F. Det is allemoal too estoan in drumkorps. Soprano's beent feailik trompetn, mear ze hebt nen wat smallerden beker en nen wat roemere oetboarige. De meeste korpsn beent oonderdoems oawer estapt op t gebroek van Bb instrumeantn, mear ze loatt de trompetn nog zo maakn det ze better beent vuur boetn, en det ze op soprano's liekt an vörm en geluud. Mellofoons wördn spesjaal oontwörpn vuur drumkorps, en noa völle prebeern bleek det ze better geskikt warn dan aandere vergeliekbere midln-register (of alt-toon) instrumeantn zo as n Fraanskn Hoorn of Flugelhoorn. Contrabasbugels beent feailik gewone tuba's, mear zo an epast, det n spöller um op n skoolder kan dreagn met n beker noar vuurtn.

Tot 1999 was t vuur drumkorpsn verplicht duur de DCI det alle instrumeantn in G-stemmige steundn. In det joar nöm t DCI-besteur n vuurstel an um ook aandere stemmiges too te loatn, zoonder det doar aandere instrumeantn vuur in de plaatse kömn (Dus gin trombones of aandere instrumeantn woer at gin ventielken an zit). Vanof 2000 gung n regel in. In 2004 köm DCA ook met. Hierduur kon bestoande (mangs klassieke) meziek dichter bie de oarsproonkelike meziek umme eskreewn en an epast wordn, en kreegn korpsn n kaans um goodkeuper an (bettere) instrumeantn te komn en de meugelikheaid um de instrumeantn makkeliker duur te verkoopn (boetn drumkorps umme, umdet det ne völle gröttere ofzetmoarkt is). De bloasinstrumeantn van drumkorps stoat rechtevoort zowat allemoal in Bb-stemmige, met de Mellofoons in F.

slagwoark

De bassliene van de Cavaliers van 2006 doot repeteern

t Slagwoark besteet oet twee verskeaidene, mear eawnzo belangrieke oonderdeeln. t Frontwoark (front ensemble, meestieds "pit" eneumd) en de batterieje of tromnriege of -liene (drumline).

Frontwoark

t Frontwoark besteet oet orkestrale slagwoarkinstrumeantn, zo as Marimba's, Xylofoons, Vibrafoons, Kloknspel, Paukn, verskeaidene tromn en biejinstrumeantn dee at de muziek oonderstönt, Bekns en Gongs. Duur de eerst eneumde instrumeantn wörd de pit mangs as bak ook wal tingelspul, -dinge of -woark eneumd. Duurdet dit soort instrumeantn vake te groot en te zwoar beent um met oawer n veeld te slepn, stoat ze op esteeld op de middelliene (50-yardliene), boetn t veeld, en kort bie t kiekvolk. Grote korpsn hebt 8 tot 12 man in t frontwoark stoan. Dr beent rechtevoort völle korpsn dee at verstoarkige in öar frontwoark gebroekt, um de fiene instrumeantn ook good te loatn heurn in grote stadions. Hieroawer wördt nog aait völle steggeld, woerbie de vroage is woer at de greanze lig, want dr beent ook korpsn dee at de verstoarkige gebreukn vuur stuks köjern, zingn, en zelfs Beatboxen.
Vuur 1982 hadn korpsn nog gin frontwoark. t Volk wat det soort instrumeantn bespeuldn leup met spesjale marsjeelmarimba's met op t veeld. Aandere korpsn (zo as Phantom Regiment en Blue Devils) hadn nen eankeln pauknspöller vuuran op t veeld stoan. Vanof '82 wör det soort slagwoark vuuran, boetn t veeld ezat.

Batterieje

De batterieje, of tromnriege, besteet oet slagwoarkers dee at op t veeld metloopt in de show, saamn met de bloazers en vlagnmeakns. Meesttieds besteet ne batterieje oet 4 soortn instrumeantn: ne riege van kleaine tromn (snare drums), Tenoorn (meesttieds "Tenors" eneumd, mear ook wal "quads" of "quints") en tonale Grote tromn dee at op verskilnde toonheugtes of esteeld beent. Mangs keump hier dan ook nog ne beknriege bie. De meeste korpsn hebt de beknriege dr achterhen edoan, zodet ze dee spöllers op aandere instrumeantn konn gebroekn. De beknrieges dee at nog wal bestoat, bedeankt vake de meest oetgebreaide visuele figuurn, dee at oawer de joarn kenmoarknd vuur öar korps beent ewördn. Wieters beent ze vake ne oonderskatte, mear belangrieke oonderstönnige vuur de muziek. De bekeandste Amerikaanse korpsn met beknrieges in de batterieje beent de Santa Clara Vanguard, de Madison Scouts en de Crossmen. n Europees bekeand korps det r kortns zonne beknriege bie hef edoan is Jubal Drum and Bugle Corps oet Dordrecht.