Snelweg

Uut Wikipedia, de vrye encyklopedy
Nå navigaty springen Nå söken springen

Nen snelweg, ouk autosnelweg of autobane is nen meyrbaansweg wår as vake med houge snelheyden ereden mag wörden. Et is untwörpen vöär rap emotoriseerd verkeer - sou as auto's, büssen, motoren en vrachtwagen - en hevt ungelykvloorske krüsingen med andere wegen en nen middenberm tüsken de twey ryrichtingen.

Neaderlandsk verkeersbord G1, dat nen autosnelweg angevt. Med kleine verskillen wördt dit bord in et gröytsten deyl van Europa ebruked.

In Neaderland is der en verskil tüsken nen autoweg en nen autosnelweg sinds et RVV van 1966. Nen autoweg hevt neet vöälledig eskeidene rybanen en allenig ungelykvloorske krüsingen, nen snelweg wal. Nen autosnelweg is in Neaderland allenig togangelyk vöär motorvoortugen wårmed med ne snelheid van ten minsten 60 kilometer per uur kan en mag ereyden wörden.

Den eyrsten autosnelweg van de wearld wear in 1921 by Berlyn eoapend under de name Automobil-Verkehrs- und Übungs-Straße (AVUS). Anvangelyk wear dissen weg ebruked as racecirkuit. In Neaderland is den eyrsten autosnelweg, ryksweg nr. 12 tüsken Voorburg en Zoetermeer, in 1937 in gebruuk enömmen.

Autosnelwegen wordet in de meyste landen (med as belangryke uutsundering de interstate highways in de Vereynigde Ståten) aneduded med en verkeyrsbord dat en piktogram van nen autosnelweg med viadukt afbealdet. Den achtergrund is dan blauw of gröön.

Belgie hevt med 57,8 km per 1000 km² et gröytsten antal kilomeaters snelweg per landuppervlakde van de Europääske Uny. Neaderland kümt up de tweyde plaatse med 56,8 km per 1000 km². In totaal hevt Neaderland 2360 km snelweg up 41.543 km² en Belgie 1763 km up 30.528 km² (cyfer 2011).[1]