Sigismund van Heiden Hompesch

Uut Wikipedia, de vrye encyklopedy
Van Heiden syn wåpen

Sigismund Vincent Gustaaf Lodewijk graeve van Heiden Hompesch, heyr van Oatmörske (Oatmörske, 24. februari 1731 - dår 5. juni 1790) was tüsken 1769 en 1786 drost van Twente un later Salland. By leaven stünd hee vöäral bekend as nen krangen baasman den sik neet geleevd makeden by de lokale inwoaners van Twente.

Leaven[bewark | bronkode bewarken]

Van Heiden wör jung in Oatmörsken as söäne van Frederik Johan Sigismund (1696 - 1769) en Eleonore Henriëtte Mauritia van Hompesch (1705 - 1740). Van nen öym an moderskante arvden Van Heiden de heyrlikheiden Stevensweert, Walburg un Ohé un Laak in Limburg. Dårümme möäg hee sik ouk Hompesch nömen. Med 15 jår güng hee hen studeren in Leiden un in 1750 solde hee studeren in Stråtsburg, mär nå twey jår trouwden hee med 21 jår med baronesse Anna Sophia Dorothea Riedesel van Eisenbach un Hermannsburg (1736 - 1803) wårmed as hee neagen kinder kreag. As Heyr van Stevensweert tröäk Sigismund med syne vrouwe in syn kasteel Walburg in Stevensweert.

In 1755 wör hee upenöämen in de Ridderskop van Oaveryssel, wåras hee sik slim löät gelden. Hee sküppeden et töt Ofvaerdigden in de Ståten-Generaal en verhüüsden når Den Haag, wåras hee de Oranjes der voordan süker andeade. In 1767 kreagen hee en synen bröder de titel graeve van keiser Josef II van et Heilige Röymske Ryk. In 1769 küm syn vader uut de tyd, wat em et baantje van drost en selvs lutenant-stadholder upleyverden, ümdat hee sou good med stadholder Willem V van Oranje kunde.

Eyne van de drosttaken, nöäst streakbestüür, was et uutspreaken van rechterlike vonnissen. Under syn bestüür wör Huttenklås med syn gesin te doud ebracht.

Van Heiden dachten sik nen mooien ekstra cent to döär de drostendeenste weader in to voren. Dee warren al lange ineperked seyd 1731 un in 1783 selvs heylemål afeskaffed, mär dår had hee ginnen boadskop an. Hee küm med allerhande selvbedachte regels, dee geheyls neet rechtsgeldig warren. Mär by oavertreading was hee unverbiddelik, der must betaald worden, of in centen dan wal in disse drostendeenste, wårby de buren vöär niks allerhande klusjes vöär em musten doon. De centen stöök hee selv in den tük. Deyls deade hee dit ouk üm de roumsk-katoliken dwars te sitten. Med syne drostendeenste makeden hee anders neet vöäle vreanden. Selvs sou slim dat hee sik in 1787 uut de vöte must maken Düütskland in.

Ouk in de Ståten-Generaal stünd hee bekend üm syne starre holding (se nöömden em selvs Colossus) un slechte behandeling van de katoliken. Do as hee es en geldbedrag verlöär by en potjen kaarten grappeden de andere heyren dat hee dan mär weader wat katoliken uut must knypen.

Syne rechtlynige holding bröäk em uutendelik up; hee wör 'vordpromoveerd' un kreag de titel Drost van Salland. Dår völlen under meyr de vöärname städen Swolle un Kampen under, mär al med al leyverden et em minder centen in de knippe.

Do as hee up den 5. juni van 1790 by syn huus in Oatmörsken in den vyver sat to visken störv hee an ne beröörde. Syne höyrige buren satten em by in de karke van Oatmörske.

Brunnen[bewark | bronkode bewarken]