Robert E. Howard

Uut Wikipedia, de vrye encyklopedy
Nå navigaty springen Nå söken springen
Robert E. Howard

Robert Ervin Howard (Peaster, 22 jannewaori 1906 - Cross Plains, 11 juni 1936) was een Amerikaanse schriever van pulpschrieverije in verscheiden genres. 't Best is e nog bekend um zien personage Conan de Barbaar, en hij wördt eziene as ien van de belangriekste uutprakkezeerders van de sword and sorcery.

Howard wördden in Texas geboren as zeune van een plattelaandsdokter en gruide op in een paar Texaanse plaatsen. 't Grootste part van zien leven bracht e deur in Cross Plains. As kiend was e van de boeken, mar hij was ok drok op boxen en bodybuilding en deu as jongkerel an amateurboxen. Vanof zien negende dreumde hij dervan aoventurenverhalen te schrieven; succes kwaamp mit 23 jaor. 't Waren de hoogtijdagen van de pulpbladen, goedkoop emeuken bladties mit verhalen waorin 't meer um de spanning en dieverdaotsie dreide as um de bellettrie, en veural in Weird Tales kun Howard zien yarns of mitslepende verhalen kwiet.

Allewal 't in 1934 haoste van een Conan-roman kwaamp, wördden Howard zien verhalen bij zien leven nooit bij menare ebracht. Mit Conan en aandere helden, zoas de Pictenkeunink Bran Mak Morn, dreug e bij an de vörmgeving van 't sword and sorcery-genre. Howard was nog aordig vlot mit de penne en schreef naost een hiele bulte verhalen ok een groot antal brieven an vrunden, uutgevers en collega-schrievers; bekend is zien briefwisseling mit H. P. Lovecraft.

Howard hef iene vriendin ehad, mit wie 't ofwisselnd an en uut was: de onderwiezeres Novalyne Price. Hij was slim ehecht an zien moe, die heur hiele leven gengelde. Toen die in een coma kwaamp waorvan de verwachting was det ze der niet weer uut zol komen, scheut hij humzölf op dartigjaorige leeftied veur 't heufd.

Nao zien dood gruide zien reputatie en wördden der deur aandern meer Conan-verhalen eschreven. Uuteindelijk wördden Conan ok uutewarkt as internationaal bekend stripfeguur, en in de jaoren tachtig kwamen der twee Conan-films uut mit Arnold Schwarzenegger. Ok de films Kull the Conqueror (1997) en Solomon Kane (2009) bint ebaseerd op Howard zien pulphelden, en hij blif een slim geliefde schriever. Zien fantasy-schrieverije heurt töt de best verkopende schrieverije ooit in det genre.

Nuvola apps ksig.png Dit artikel is eschreven in 't Zuudwest-Drèents.