Rijk van Rotterdam

Rijk van Rotterdam ('t Veen, 1948 - 16 juni 2001) was een Nederlaandse schriever, journalist en jazzmuzikant uut de Utrechtse plaatse 't Veen (Veenendaal).

Journalistiek wark

Zien journalistieke loopbane begunde in 't Veen bij dagblad De Vallei. Hij besprak theater en film en schreef later ok columns. Veur zien column in de Arnhemse Courant gebruukte hij de schuulname Madrettor. Töt zien hennegaon op dreienvieftigjaorige leeftied was e keunstredacteur bij dizze kraante.

Literaire schrieverije

In 1984 verscheen van hum de verhalenbundel De rookstoel op het groene laken, mit zeuven verhalen aover mèensen die in een uutzunderingspositie verkeert of in 't nauw edreven bint. 't Aandere jaor verscheen de roman Vechten, waorin Sim Kalberg, een jonge uut een kaansarm gezin, kennismak mit een keunstenaarsgezin en haopt det zij hum kunt helpen uut zien milieu te ontsnappen.

In 1986 volgde 't tenielstok Met open blik, een bijdrage an de soap-opera Tussen Hoop en Wanhoop, die töt stand kwaamp in opdracht van 't Gelders Centrum voor Amateurtoneel.

Muzikale bezigheden

Rijk van Rotterdam beweug hum in de jazzscene van 't Veen en speulde gitaar en contrabas. Zien veurbielden waren de Amerikaanse jazzgitaristen Wes Montgomery en Barney Kessel. Verscheiden maolen hef e opetreden op jazz- en gedichtenaovends in de Veense beatclub 't Dingetje. Lange tied speulde e samen mit pianist Cees Diepeveen en drummer Paul van Kreel.

Bibliografie

Proza

• Ten noorden van de hand: verhalen en gedichten van Arnhemmers (bijdrage, 1983)
• De rookstoel op het groene laken (verhalen, Veen, 1984)
• Vechten (roman, Veen, 1985)
• Huissen, Het Zand, Looveer, De Zilverkamp (in de riege 'Gelderland in proza, poëzie en prenten', mit een prent van Jan van Krieken, 1988)
• Biënnale in blauw (diel 3, gastschriever, 1996)

Non-fictie

• Huis der provincie Gelderland: bouwkunst: een brochure over het samengaan van architectuur en beeldende kunst

Bronnen

• Schrijversinfo.nl aover Rijk van Rotterdam
• 't Blog 'Veens Lawaai' aover Rijk van Rotterdam

Dit artikel is eschreven in 't Zuudwest-Drèents.