Båke

Lüde bint samen by ne båke in Eibargen (2006)

Up Eyrste Påskedag wördt in een grout noord-westerlik gedeylte van Europa båkes anestöäken. Ne Båke is een grout vüür, wat wördt ebrand üm de köälde en et düüster van de winter te verdryven, en den koamst van de lente te vyren, of üm te vyren dät Lente et van Winter ewünnen hevt.
De noordgrense wår at dit gebruuk vöärköämt löpt döär Denemårken, de süüdgrense döär Switserland en Oustenryk. De westergrense löpt döär Neaderland oaver de lyne den et neadersassiske gedeylte underskeid van et hollandske deyl, en de oustergrense löpt döär et düütske Hartz-gebeed.

Geskydenis

ne Båke by Onstwedde up Tweyde Påskedag 2004

Dät is een old germaansk gebruuk wat syn oorsprung noch vöär den koamst van et Christendom hevt. Wårskynlik gelöyvden de germanen dät et vöär öär ouk beskårmen teagen kwåde geysten, en was et vöär ne verseakerige vöär vrüchtbårheid. De aske wat van de båkes köämen, wördden oaver et land verdeyled, wat good was vöär de grund. De christenen probeerden et heidenske gebruuk der uut te krygen, maer dät is öär neet elükked, maer de beleaving van ne båke is vake neet maer med de germanen verböänden. De rooms-katoliken hebbet et gebruuk verdraeied en der een roomsk feest van emaked.

In Twente wördt dit gebruuk båkebranden enöömd. De lätste jåren bint der strenge miliövöärskrivten an verböänden.

Vöärbereiding

Weaken, en mangs månden in et vöärden bint båkebouwers drok üm nen so houg möägeliken stapel te maken. ne Båke kan wal boaven de 10 meater houge wörden. Båkebouwers gaddert snöäiholt by mekår en settet in et lätsten nen steiger up üm noch höyger te künnen bouwen.

In den tweydüüster wördt de båke anestöäken. Hyr köämt vöäl volk up of, dee et der med mekår nen mooien åvend van maket, med häpkes, beer en Båkebitter. Den volgenden dag kün y oaveral ruken dät de lente syn intreade hevt emaakt.

Et bekendst bint de twentske båkes, ümdät et gebruuk hyr noch et meyste vöär köämt. Twente hevt et meyst antal båkes pèr kilometer van Neaderland.

Wearldrekord

Et is gebruuk üm med nåberskappen nen wedstryd te holden wee et de gröytste båke kan bouwen. Et wearldrekord steyt up naam van den nåberskap Splo by Ryssen en Holten, med ne höygte van 27 meater. Andere underdeylen van de wedstryd sint wee et de mööiste båke kan bouwen (form) of med de meyste inhold.

2011 haalden de nåberskap Dykerhook et wearldrekord vöär de båke med de meyste inhold: 4907 kuub. Dit was möägelik döärdät båkes van andere buurskappen in de büürte neet anestöäken mochten worden, ümdät et te dröyge was en düs gevår vöär buskbranden.

In 2012 maakten Splo bekend wear ne wearldrekordpoging te doon. Et werd ne båke van 45,98 meater hoge met ne inhoold van 9174 kuub. Hier woarket alle Sploder noaberskopn an met.

Rymken

Poasken

Stokket de Boake hooge,
stekt den stapel an,
det slöt oe op t ooge,
zulk kooldern at-e kan!

De noabers bouwdn al wèkke,
dn stapel is egröaid.
non knispert doar de tèkke,
zo glöainig mooi, zo t glöait.

Loatt det veur non braandn,
de wöarmte dut oe good.
In alle ummelaandn,
doar roekt ze wa-w non doot.

Heurt dee tèkke knèttern,
den weend den jaankt dr duur,
Non zal t weer zik bèttern,
De keulte geet met t uur.

Alleman keump kiekn,
fles boakebitter met,
De weenter mut non wiekn,
den doerdn al zonnen zet.

In dee koolde tiedn
was t bouwn al lang begunn.
Mie duch, non ma-k t liedn,
Det de Leante hef ewunn!

Martin ter Denge, 2007

Neadersassisk

• Grönningsk:
  • Poas(ke)vuur (et geböären)
  • Poasbult, poasboaken (et ding sülv; båken is in et Grönnigs een algemayn woord vöär een brandende ståpel)
• Achterhooksk: Poasvuur(bult)
• Sallandsk:
  • Poasbult (de bülte),
  • Poasvuur (de vlammen wat et gevt)

Verwysingen

Disse pagina is eskreewn in t Riesns

Commons: Båke - plaatjes, filmkes en/of gelüüdsbestanden.