Nissan Leaf
De Nissan Leaf is n elektrische auto van de Japanse fabrikant Nissan. De noam Leaf is n òfkörten van Leading, Environmentally friendly, Affordable, Family car. De viefdeurs gezinswoagen kwam in december 2010 op d'Europese maarkt en was sunt meert 2011 in Nederland leverboar. In september 2017 het Nissan de twijde generoatsie Leaf prezenteerd, dij vanòf jannewoarie 2018 in Nederland opleverd wör.
Techniek
[bewark | bronkode bewarken]
De Nissan Leaf n Lithium-Ion akku's dij oploaden worden kinnen mit twij aansloetens aan de veurkant van d'auto. Ain aansloeten is veur n normoal stopkontakt, d'aander aansloeten is veur t snelloaden.
Tot 2016 haar d'eerste generoatsie n akkupakket van 24 kWh, woarmit n òfstand van 160 km (volgens NEDC-testcyclus) berekt worden kon. Begun 2016 kwam der n 30kWh-variaant bie mit n berek van 250 km (NEDC). t 2017-model het n 40 kWh-pakket mit n berek van 378 km (NEDC). Doarnoast zel n duurdere oetvoeren kommen mit n staarkere motor en akkupakket mit nog meer berek. d'Elektromotor drift de veurroadens aan en t akkupakket zit in de woagenbodem.
Nijlootjes 2013
[bewark | bronkode bewarken]Veur t modeljoar 2013 binnen de volgende verbeterns deurvoerd:
- Nije elektromotor
- Verbeterde aandrieflien
- Massa 80 kg verminderd
- Kovverruumte mit 40 liter vergroot noar 370 liter
- Betere terogwinnen van remenergie
- Energiezunegere interieurverwaarmen
- Òfstandsberek noar Japanse meetwieze 14% vergroot noar 220 km
- Meugelke extroas: LED-koplampen, Around View Monitor en BOSE geluudssysteem
Nijlootje 2016
[bewark | bronkode bewarken]Veur t modeljoar 2016 wer t 30kWh-akkupakket leverboar mit n berek van 250 km (NEDC).
Twijde generoatsie
[bewark | bronkode bewarken]Vanòf jannewoarie 2018 is de twijde generoatsie Leaf leverboar in Nederland. Dizze krigt n 40 kWh-akkupakket mit n berek van 378 km (NEDC). De nog te verwachten duurdere oetvoeren zol n akkupakket van 60 kWh kriegen, mit n nog onbekìnd berek.
Nijlootjes
[bewark | bronkode bewarken]Veur t modeljoar 2018 binnen nije technieken beschikboar, dij elektrisch rieden op n hoger plan brengen:
- Mit t e-Pedal kin de woagen haldaal tot stilstand kommen deur bloots t pedoal lös te loaten, zulfs as de woagen op n hèllen staait. In 90 persìnt van de gevalen zol t e-Pedal mans genog wezen, ook in drok stadsverkeer. n Gewoon rempedoal is der nog en t e-Pedal-systeem kin oetschoakeld worden.
- ProPILOT zörgt dat de woagen zulfstandeg binnen de wegbelienen blift.
- Mit ProPILOT Park kin de Leaf haldaal zulfstandeg inparkeern.
- Mit V2G (vehicle to grid) kin de Leaf stroom levern aan t lichtnet en doarmit ondersteunen geven bie piekmementen in t verbruuk.