Netflix

Uut Wikipedia, de vrye encyklopedy
Nå navigaty springen Nå söken springen

Netflix, Inc. is et amerikaanske bedryv achter en internetplatform wårup films, dokumentäres en tv-ryges rechtstreaks te bekyken sint. Et höyvdkantoor sit in de stad Los Gatos in den ståt Kalifornie. Et wör upericht in 1997 döär Reed Hastings en Marc Randolph, vanuut Scotts Valley, ouk in Kalifornie.

Et bedryv büdt abonnementen vöär ströymde films en televisyryges. Mangs sint dee van darden, mär inmiddels hebbet se ouk geld sat üm se selv te låten maken. In oktober 2020 had Netflix 195 miljoon inskreavenen oaver de heyle wearld, wårunder 73 miljoon in de Vereynigde Ståten. Et andeyl neaderlandske inskryvers is inmiddels souwat 3 miljoon[1]

Netflix is wearldwyd te krygen, behalve in China, Syrie, Noordkorea en de Krim (vanweage amerikaanske strafmåtregels). In 2020 had Netflix en inkummen van $1,2 miljard. Et bedryv hevt kantoren in Frankryk, et Vereynigd Köäningryk, Brasilie, Neaderland, India, Japan en Süüdkorea. Netflix is lid van de Motion Picture Association, wårmed se filminhold van oaver de heyle wearld produceert en verspreidet.

Netflix deade eyrst geld verdenen med DVD-verkoup en postverhüür, mär Hastings deade der nå et eyrste jår et verkoupen al achterhen en richteden sik up de verhüür van DVD's. In 2007 breidden Netflix et sakelike anbod uut do as media ströymen möägelik wör, mär se hölden sik noch altyd gangs med DVD- en Blu-rayuutleyn. In 2010 güng Netflix internationaal, med ströymingdeensten in Kanada. Neet lange dårnå breidden se uut når Latynsk-Amerika en de Karaiben. Netflix begün selv te produceren in 2013, med as eyrste ryge et politike drama House of Cards.

Seyd 2012 is Netflix aktiver as producent en anbeder van films en televisyryges. Dårvöär bedet se filminhold under de nömer 'Netflix Original' ("van Netflix") in öär online oaversicht. Anvang 2016 was Netflix al in 190 landen te krygen. Se gavven in 2016 ungeväär 126 tv-ryges en films uut under eygen name. Dår kunde gin ander netwark of kabelkanaal teagenan.

Döärdat se sou druk sint up ny materiaal, de rechten vöär andere filminhold en uutbreiding döär 190 landen steyt et bedryv vöär miljarden in et roud: $21,9 miljard in september 2017. Dårvan is $6,5 langloupenden skuld. In 2018 kundigden se an dat se der noch es twey miljard an skulden by upnömmen üm meyr films te künnen maken. Up den 10. july 2020 was Netflix et grötste media- en vermaakbedryv up de böörse.

Bronnen / wellen:
  1. televizier.nl. 'Aantal Nederlandse netflix-abonnees afgelopen maanden flink gegroeid.' Skreaven up 21 april 2020. Bekeaken up 4 december 2020.