Mieke Telkamp

Mieke Telkamp in 1962

Mieke Telkamp, artiestenname van Maria Berendina Johanna (Mieke) Telgenkamp (Oldensel, 14. juni 1934 – Zeist, 20. oktober 2016) was ne sangeresse uut Nederland. In Neaderland is se vöäral bekend van öär leed Waarheen, waarvoor, ne bewarking in et neaderlandsk van et engelske gesang Amazing Grace. In 1971 tröäd se dårmed nå nen set afweasigheid weader in de bekendheid.

Jöägd

Telkamp groiden up in Oldensel, un was dår by et koor van de katolyke Sunt-Plechelmusbasilik. In 1952 höyrden Gerard van Krevelen, nen talentsöker vöär de AVRO, öär singen un nöydigden öär uut üm der wark van to maken.

Loopbaan

Tüsken 1953 un 1967 wüst se meyrdere målen houge in de hitlysten to kummen. In 1953 bröäk se döär med Here in my heart, wat al in 1952 döär Al Martino süngen wör. Dårnå wörden öär nummers Nooit op zondag un Eb en vloed vöäle draid. In Westdüütskland wüsten se öär ouk to waerderen. Van öär grötste hit Prego, prego gondeliere wörden dår souwat nen miljoon singles verkocht. Ümdat öär esegd wör at Telgenkamp ginne handige name was vöär döärbreaken in de Prüüs, makeden se der Mieke Telkamp van.

Nå den Tweyden Wearldoorlog was Telkamp de eyrste sangeresse uut Neaderland wat et andörvden üm weader in et düütsk to singen. Dårvöär kreag se in Neaderland un in de düütske gebeden de handen up mekander. Öär eyrste düütske leed Morgen komm' ich wieder wör enkel in Neaderland uutebracht un vöäle draid. Med Du bist mein erster Gedanke begün se ouk in Westdüütskland good to verkoupen. En sammelalbum med düütske sukcessen güng under den titel Tulpen aus Amsterdam souwat en miljoon mål oaver de töynebanke.

Up et Festival van Venetie wün see de eyrste prys, un in 1962 dea se med an et leedkesfestival van Knokke, samen med Anneke Grönloh, dee ouk ne bekende sangeresse solde worden. De beide sangeressen kunden vanaf den tyd al good med mekander.

In 1964 stünd Telkamp in de Snip & Snap revue. Undertüsken had se voordan last van den buuk, un dokters råden öär et händiger an to doon. See tröäk sik torügge uut de showbusiness. Dree jår later, in 1970, beslööt see et noch es to proberen. Uptreaden langs teaters un salen in et land was der neet meyr by. Singen dea se vanaf dee tyd enkel noch up platen un vöär radio un televisy.

In 1971 süng see öären grötsten hit in: Waarheen, waarvoor. Et was nen neaderlandsken tekst van Karel Hille, up de melody van Amazing Grace, nen bekenden amerikaansken spiritual. Under leiding van Harry de Groot nöm see et nummer up med de Hi-Five. Dat idee küm van Frank Jansen, den as ouk de musikprodukty dea. In Neaderland verkochten et meyr as en miljoon platen, un see kreag der öäre eyrste Goldene Plate vöär. Jårenlange was Waarheen, waarvoor eyne van de meyst-edraide nummers by grovendeensten.

As eyrste menske uut de showbusiness wör Telkamp in 1978 eridderd in de Orde van Oranje-Nassau. Öär lätste uptreaden was in 1990. Augustus 2008 küm der ne dvd med den titel Alles voor jou, med veertig upenöämene leedkes uut de tyd tüsken 1959 un 1989. Up den 13. december 2008 kreag Telkamp by Omroep MAX noch es nen Diamanten Award vöär et verkoupen van eyn miljoon platen van Waarheen, waarvoor. Den prys kreag se uut handen van öären vreendin Anneke Grönloh.

Up den 10. määrt 2011 nöm see by Omroep Max vöärgood afskeid van et groute publik. Vanaf dee tyd löäten se em geworden un woanden see händig in Zeist. In 2016 küm see med 82 jår uut de tyd. Dat löät et management van Anneke Grönloh weaten.

Persöönlik

Telkamp trouwden twey mål. Et eyrste mål med Gerard Zuur, den as höyvd Amusement was by de AVRO. Kinder kümmen der neet.

Y müt et mär weaten

• Ne byname vöär Mieke Telkamp was Mie Ketelkamp. Dat was en gräpken van Ferry de Groot uut de Dik Voormekaar Show.
• Telkamp was vasten gast by de AVRO's Wie-kent-kwis.
• Telkamp had en tydjen ne advysrubrik in et tydskrivt Weekend.
• By Telkamps grove wol see neet hebben at Waarheen, waarvoor, edraid wör. Et must de hymne van den doud weasen uut den film Once Upon a Time in the West.

Platenryge

Albums

Albums in de neaderlandske Album Top 100

Naam	Jår	Binnenkumst	Höygste steade	Antal weaken
Haar grootste successen	1981	02-05-1981	7	7

Singles

Albums in de neaderlandske Album Top 100

Naam	Jår	Binnenkumst	Höygste steade	Antal weaken	Bysünderheid
Sleigh-ride in Alaska	1959	-			Nr. 6 in de Single Top 100
Morgen	1959	-			Nr. 3 in de Single Top 100
Whispering hope	1960	-			Met Yvonne Oostveen
De drie klokken	1960	-			Nr. 7 in de Single Top 100
Nooit op zondag	1960	-			Nr. 3 in de Single Top 100
Waarheen, waarvoor	1971	27-03-1971	7	24	met De Hi-Five / Nr. 9 in de Single Top 100
Het dorpje van St. Bernadette	1971	02-10-1971	tip
De nieuwe dag	1971	16-10-1971	17	6	Nr. 16 in de Single Top 100
Sierra Madre Del Sur	1973	19-05-1973	tip