Mekelenborg-Vuurpommeren

Uut Wikipedia, de vrye encyklopedy
Mekelenborg-Vuurpommeren in Duutslaand

Mekelenborg-Vuurpommeren (Hoogduuts: Mecklenburg-Vorpommern) is een boondslaand in et noordoosten van Duutslaand. Et lig in et middeln van de zudelike Oostzee. In juni 2015 wonden der 1.600.599 leu op ne vlakte van 23.211,05 km².

Et laand ontsteund in 1945 toen as de oolde strekkken Mekelenborg en Vuurpommeren bie mekaar ezat wörden. Noa de opdeling in dree strekken in de DDR in 1952 wör et in 1990 vanniejs op erichtet en een deel van de Boondsrepubliek Duutslaand noa de Duutse wiervereniging. In et noorden ligt et an de Oostzee, in et westen an Sleeswiek-Holsteen en Nedersaksen, in et zuden an Braandenborg en in et oosten tegen Polen an. Et laand is opdeeld in zes laandskringe en twee kreenkvrieje steaden. De heuwdstad is Zwerin, mer de grötste stad is Rostock. Aandere grote steaden zeent Zwerin, Niejbraandenborg, Stroalsund-Griepswoold, Wiesmar en Güstrow. De metropoolsteaden Hamborg en Berlien, de Öresundstrekke tusken Zweden en Denemaarken, en et Poolse Stettin hebt invlood op et boondslaand.

Belangrieke industrietäkke zeent de skeepvoart, machinebouw, energietechniek, leawensmiddelindustrie, hoge technologie met vuural de biotechnologie, medisientechniek. locht- en ruumtevoarttechniek, en IT. Doarnöast zeent toerisme, deenstverlening, laandbouw en gezoondheadsdeenste belangriek vuur de laandsknippe. De Ernst-Moritz-Arndt-universiteat in Griepswoold en de Universiteat van Rostock zeent twee van de euldste van Europa. Disse en wietere heugere skolen trekt verdan mear startende oondernemmers, mer ook oontwikkelde technologiebedriewe an.

Mekelenborg-Vuurpommeren hef dree van de 16 Nasjonale parken van Duutslaand. Det zeent der mear as ieder aander boondslaand. Doarnöast gef et doar acht Natuurparken en hoonderden beskaarmde natuurgebeden. De twee grötste eilaanden van Duutslaand, Rugen en Oezedom, ligt an de Oostzeekuste van Vuurpommeren. Mekelenborg-Vuurpommeren is heuwdzakelik vlak, mer et gef duur den lesten Iestied een antal heuwelkettens zo as Mekelenborgs Zwitserlaand en mearenlaanden zo as et Mekelenborgse mearenlaand. Et laand is slim waterriek. Et hef ne kusteliene van ongevear 2000 km en verskeaidene bochten en lagunes. Doarnöast lig der een oetgebreaid net an rivieren en kanalen. Doar komt nog mear as 2000 mearen bie. Et grötste doarvan is Murits, wat ook meteen et grötste mearen van Duutslaand is. Mekelenborg-Vuurpommeren hef een vastelaands-koelgematigd klimaat, wat oonder invlood steet van de Oostzee.