Bakkiesman

Een bakkiesman (Nederlaans: marskramer) was een huus-an-huusverkoper van kleine artikels in de tied dat veul verkopers gien vervoer konnen betaelen en doe et antal winkels redelik min was. De bakkiesman dreug zien haandelsweerde altied in een körf (de mars) op zien rogge.

Een gezegde dat naor de bakkiesman verwiest, is: wat in zien mars hebben (wat in zien körf hebben).

'Marskramer' is de naeme van een werenhuus in huushoold- en speulgoedartikels.

In de Nedersaksische schrieveri'je

Een fragment uut 'De kiepenkeerl' deur Heinrich Hensen (Graofschop Benthem):

Eenmåål in 't joor, meestieden in't vöörjoor, kwömp de kiepenkeerl up unsen hof. Ene wunde in Uelsen en den annern in Nijnhuus. Met de grote kiepe uut hault up de rügge en met de halflange piepe in de mund göng he de buren bijlangs, dat dä he.

In siene "benne", så nöömden se watwechtern ok de kiepe, hadde hee van allen in, of et bummelde d'r bij an. Botternäppe en botterdosen uut hault, groten, üm de botter door in te kneen, en kläinen, üm se up te tåfel te setten, sleve uut hault, bössels van allerläi soorten en grötden, wetstene, pikstrikke, men ok wal swaan.

Ik weet noch wal, dat he is 'n måål in de köken trad, en met sienen handstok den hund ofweerde, de tegen hem anblekde. Du setde hee siene kiepe up de tåfel, en mien moder begünt, de saken nijsgierig te bekieken. Så 'nen groten schepnap bekeek se wal, tenminste föör mien vader, met besünners groot belang, want hee sä: "Wat wis du door met så 'nen groten sleef doon, så 'nen pot hebbe wij ja garnich, wor den in past". Hee sul ok wal an sienen knippet denken.

[...]

Nå 'n krieg wödde et alle minder met de kiepenkeerls, en rechtefoort söt men se ja gaarnich meer. Of se van aults uut 't Münstersche of uut de Gronau kwammen, dat nemme ik wal an. Want ik bin is 'n måål in Münster west, du hadde ik wat met de ågen, en door hebt se så 'nen keerl up'n denkmåål set', 'nen kiepenkeerl met siene benne.

Uut: Wilhelm Horstmeyer (red.) (1994), Ut de pütte: Groafschupper Platt föar groot en kläin, Verlag Heimatverein der Grafschaft Bentheim e.V.

Nedersaksisch

• Achterhooks:
  • kisjeskearl
• Drèents:
  • heuker
  • kantedraagster (rondtrekkende koopvrouwe)
  • kiepieskerel, kiepkerel
  • marsieskerel
  • negosiekerel
• Grunnegs:
  • kiepkirrel
• Stellingwarfs:
  • bakkiesman
• Tweants:
  • (benn)kremer (Oold-Riesns)
  • kiepenkearl
  • kistnkearl
• Graofschopper plat: kiepenkeerl
• Westföälsk: Kiepenkeerl

Uutgaonde verwiezings

• Marskramer.nl