Kroamschudden

Et kroamschudden is ne olde tradisie woarbi-j ne krentenstoete, krentewegge of pillewegge ebrach wöd noar et ni-j geboarn kind binnen ne noaberschap. Dat wöd veurof egoan deur et 'ansprekken' deur de vrouwen uut de noaberschap.

Ansprekken en krommen arm

Al kort noa de geboarte kompt disse vrouwleu de moder ansprekken (bezeuken) en et kind bekieken. Mangs wodt doarnoa alle noabers derbi-j ehaald en goat ze 'kroamschudden' (op kroamvesite). Dan komt ze met nen 'krommen arm', woarmet wöd bedoold dat de noabers ne krentenstoete metnemt. De stoete kan wal 2 meter lange waen en wal dartig centimeter breed. De stoete, dee at arg zwaor is, wöd deur alle noabers edragen, en wöd op ne planke legd. Mangs is et ne kunstige pronkstoete en den bakker mag veural neet te 'krenterig' waen met de krenten.

Ok den roombotter wöd met-enommen, want dat heurt doar bi-j. In de olde tradisie mag den noasten noaber de stoete ansnieden. Doarnoa wöd veur iederene nen plak of-esneden en doar kump ne dikke loage echte botter op. Woarbi-j et kind de riege langs geet, en iederen noaber et efkens mag vasteholden.