Jannie Stalknecht

Jannie Groenendal-Stalknecht (Grunnen, 16 oktober 1928 – 25 juli 2017) was n Grunneger jazzzangeres. Zai was d'eerste dij Grunnegstoalege jazz zong, onder t pseudoniem Martina.

Leven en waark

Jannie Stalknecht wer geboren in de Stad-Grunneger Oosterpoortwiek as dochter van Willem Jan Stalknecht en Jantje Buurlage. De kinder Stalknecht gruiden op mit meziek. Voader Stalknecht was noast zien waark bie de Spoorwegen trompettist in n meziekkorps. Bruier Roelof (1926-1995) wer n bekend jazzpianist. Jannie en heur jongere zuske Rieka zongen eerst benoam in femiliekring.

Via haar bruier leerde Jannie heur man Jan Groenendal (1925-1994) kennen, dij trompet speulde en veurzitter was van de Groninger Jazz Sociëteit. Zai traauwden in 1954. Pas in feberwoarie 1960 trad Jannie noar boeten as zangeres van t ensemble De Thrianta's, onder laaiden van radiomoaker Tonny M. van der Veen. Zie wazzen sikkom wekelks te heuren op de VARA-radio. In maai 1960 wer de televisietoren Smilde officieel opend. Ter gelegenhaid doarvan wer deur de NTS, in soamenwaarken mit de RONO, n tv-pergram oetzonden vanoet de Prins Bernhardhoeve in Zuudloaren. Tiedens dij oetzenden zong Stalknecht mit De Thrianta's.

Echtgenoot Jan Groenendal vertoalde körte tied loater t nummer Lover come back to me in t Grunnegs. t Nummer was eerder zongen deur o.m. Billie Holiday en Ella Fitzgerald. Jannie zong t as Laiverd, kom weer bie mij in Van der Veen zien radiopergram, woarnoa ploatenmoatschoppij CNR kontakt mit heur opnam. Gaauwachteg werren nog drij nummers vertoald, woaronder Bei mir bist du schön van The Andrews Sisters en Sentimental Journey van Doris Day. t Gehail wer opnomen in de Grunneger Remonstrantse kerk en in de zummer van 1960 oetbrocht op de EP Martina zingt bie Martini, woarop ze begelaaid wer deur t Roelof Stalknecht Trio. De ploatenmoatschoppij vruig t pebliek oet te vinden wèl achter de noam 'Martina' schoel ging en loofde doar priezen veur oet. 'Martina', kreeg landelke bekendhaid mit Laiverd Kom Weer Bie Mie en Allain is moar allain. Jannie bleef der nuchter onder en nam zangles. Der wazzen plannen om onder aigen noam Engelstoalege nummers oet te brengen, mor dat is der nait van kommen. In 1974 wer n Grunnegstoaleg verzoamelalbum oetbrocht deur Philips, mit doarop twij nummers van Jannie Stalknecht, vernijs begelaaid deur t trio van heur bruier. Heur nummers worden ook wel deur aander Grunnegen artiesten vertolkt.

Jannie Stalknecht kwam oet tied in 2017, op 88-joarege leeftied. Zai is opnomen in de Groninger Vrouwengalerij, n initiatief van De Verhalen van Groningen oet 2019.

Diskogroafie

• 1960: Martina zingt bie Martini (CNR), EP mit de nummers
  • Laiverd, kom weer bie mij (Lover come back to me)
  • Allain is moar allain (Bei mir bist du schön)
  • Dien bliede lach (The sunshine of your smile)
  • Terugkiek (Sentimental Journey)

• 1974 Grunneger ploatwerk (Philips), verzoamel-LP mit twij nummers van Jannie Stalknecht mit t Roelof Stalknecht Trio:
  • Boukenlaidje
  • Ik zuik een vent

Externe links

• Laiverd, kom weer bie mie op YouTube
• Allain is moar allain op YouTube
• Dien bliede lach op YouTube
• Terugkiek op YouTube

Wèllen

1. Jannie Stalknecht, Poparchief Groningen.
2. Sanne Meijer, "Jannie Stalknecht: een Groningstalige jazzzangeres", De Verhalen van Groningen.
3. "RA, RA, WIE IS DAT? Geheimzinnigheid rond „MARTINA” in Martinistad", Nieuwsblad van het Noorden, 3 september 1960
4. "TV-radio Martina niet ondersteboven van haar succesje". Het Vrije Volk, 13 oktober 1960
5. "Groningse Martina neemt nu ... zangles", Zeeuwsch Dagblad, 15 oktober 1960
6. "Eerste Groningstalige jazz-zangeres Jannie Stalknecht overleden", RTV Noord, 1 augustus 2017
7. "Groninger Vrouwengalerij", Dagblad van het Noorden, 21 augustus 2018
8. Els Zwerver, 'Laiverd, kom weer bie mie', Groninger Gezinsbode, 6 maart 2019