Internetmeme

Uut Wikipedia, de vrye encyklopedy
Nå navigaty springen Nå söken springen

Ne internetmeme (spreak uut as 'internetmym') is en koncept of en idee wat sik oaver internet rap verspreidet. Et is verwant an et idee van nen meem, al slöt den lätsten up ne vöäle gröätere gruup kulturele draegers dee van persoon töt persoon verspreided wordet. By internetmeems kümt et der meysttyds up dale dat et nen grap is den as up internet begünnen is binnen ne kleine gruup online lüde verbünden döär ne deylde interesse. Dårdöär sint de grappen van internetmeems vöär butenstånders lastig te bevatten.

De meyste meems verskynet as weaderkeyrige plaatjes med nen tekst der up. Vake sint se ironisk of sarkastisk bedoold. Disse künnet uut et nys kummen, mär ouk citaten uut films, böke en andere kultuurdraegers künnet meems worden.

Kenmarken van ne internetmeme[bewark | bronkode bewarken]

Et vöärnaamste kenmark van internetmeems is dat se online deyld wordet. Meems volget gin vast, vöäraf bepåld formaat. Foto's van echte lüde en deers, med name stockfoto's, leynet sik good vöär meems döär der nen tekst oaverhen te leggen. En vöärbeald is de Overly Attached Girlfriend of Hide-the-Pain Harold. Ouk Rage Comics sint ne subklasse van meems, wårin as ne ryge menskelike gevölens wordet uutebealded med nen satirisken clue.

Oavereynstemming oaver wat ne meme inhöldt wördt voordan uperekked. Et vöärnaamste is herhaling en kleine anpassingen in de grap, soudat de verwysing når de oarsprungelike meem oavereande blivt mär nu relevant is vöär ne lecht afwykende situaty.

Internetmeems hebbet vake twey vaste kenmarken: se künnet up kreative wyse nåmaked worden en se warket intertekstueel. Et eyrste kenmark utet sik in parodien, remixes en mashups.

En vöärbeald van en parody is de "undergang van Hitler", up ne scène uut de film Der Untergang. Dårin krigt Hitler van syne generaals te höyren dat et neet al te best geyt med den oorlog, wårup as hee slim van sik afbekket. In de parody wordet de undertitels by disse scène gebruked üm der totaal wat anders van te maken, byvöärbeald uneynigheid oaver een uutstäpken når nen derentuin. En vöärbeald van intertekstualiteit untsteyt as twey verskillende kulturele utings med mekander samenevoogd wordet. En vöärbeald was den amerikaansken politikus Mitt Romney syne uutspråke van "mappen vul med vrouwlüde" tydens en presidentieel debat in 2012, den as monteerd wör oaver en deyl van de musikvideo van et koreaanske nummer 'Gangnam Style', wårin as den artist Psy vöär en windapparaat steyt wåruut nen heylen fossen papyr langs em hen eblåsen wördt. Döär de intertekstualiteit untsteyt by dat beald ne nye bedüding.

Hougleraar biology an de Universiteit van Texas, Lauren Ancel Mayers, meynet at meems sik oaver sociale media lyk verspreidet as seekdes. Et is de basis van virale marketing, ne technik wårby as marketingbureaus proberet nen meem te maken.

Nen meem kan ja nen foto, video of geluudsbestand weasen, en gerucht of citaat. Spreiding verlöpt oaver yder internetkanaal wat vrywillig deylen tosteyt. Meems künnet lange blyven hangen, mär up den duur raket se vergeaten. Dan wordet se in et engelsk ne doude of olde meem enöömd. Mangs blivt ne bepålde meem binnen ne kleine gruup lüde bestån. Mangs kummet se weader töt leaven ümdat ymand ne meem heruntdekket.

In vöäle online gemeynskappen groit ne eygene 'meemkultuur', by vöärbeald binnen ne gruup van anhangers van ne bepålde politike ströyming of geslachtsrullen. De meyste meems sint dårümme selvreferentieel, wat wil seggen dat lüde binnen de gruup de grap begrypet ümdat et verwist når öäre eygene dagelikse warkelikheid en innerlike oavertügingen. Sou untståt ingruupmeems dee as vöär nen butenstånder mär moilik te bevatten sint. Dit is te vergelyken med soortförming binnen de evolutie. De meyste populäre internetmeems stammet uut disse tospitsde grupen.

Uutgånde verwysing[bewark | bronkode bewarken]