IJsselhallen

Uut Wikipedia, de vrye encyklopedy
De IJsselhallen

De IJsselhallen bint een evenementencomplex in Zwolle waor beurzen, concerten en tentoonstellings eholden wördt. 't Complex bestiet uut vier hallen, twee zalen, een restaurant en een bar en hef een totaal vloeroppervlak van roem 20.000m². Der heurt ok een parkeerterrein mit meer as 3.000 plaatsen bij. De IJsselhallen ligt an de Rieteweg, in de onmiddellijke naobijheid van de A28, 't treinstesjon en de binnenstad. Alle jaoren bint der 400.000 töt 500.000 bezukers.

Geschiedenis[bewark | bronkode bewarken]

De 'veemarkt - manifestatiehal' IJsselhal in anbouw, 1971

De IJsselhallen hebt heur oorsprong in de Zwolse biestenhaandel. In 1308 kreeg Zwolle van de bisschop van Utrecht toestemming um een veemarkt te holden. Ieuwenlaank wördden de markt in de open locht eholden. De Zwolse biestenmarkt was in 1890 ien van de grootste van Nederlaand en gruide staorigan.[1] In 1918 wördden 't terrein van de hudige IJsselhallen opeheugd veur gebruuk as biestenmarkt. Vanof 1928 wördden der de neudige dienstgebouwen, zoas een slachthuus, ebouwd en bestraoting anelegd, en in 1931 wördden 't terrein as biestenmarkt in gebruuk eneumen. Uutbreiding van 't terreinoppervlak vund plaats in 1964. Umme de markt antrekkelijker te maken, besleut de gemiente in 1970 töt bouw van een grote biestenmarkthal naor veurbield van zo'n hal in de gemiente Veendaam.[2]

De IJsselhal, ebouwd naor een ontwarp van architect Gerrit Bastiaan Kalkman, wördden lösedaone op 24 april 1972. Behalve veur biestenhaandel beud de hal onderdak veur zaalsport, tentoonstellings, rommel- en antiekmarkten, examens, verkiezingsbijienkomsten, woonbeurzen, concerten (mit optredens van wereldsterren as Fats Domino, Pat Boone en James Last), enzowieder.[3][4] Vanwege al dizze evenementen kwaamp der behoefte an uutbreiding. Bij de IJsselhal kwamen in 1985 de Meerhal, in 1990 de Aahal en Diezehal en in 1994 nog twee congreszalen. Alle zalen en hallen bint op de begane grond. Sinds 2001 wördt der de veemarkt niet meer eholden en bint de IJsselhallen uutslutend bestemd veur evenementen.

Toekomst[bewark | bronkode bewarken]

Umdet de gemiente Zwolle in 2025 wil begunnen mit woningbouw op de locatie, is 't huurcontract mit exploitant Libéma niet verlengd. Eind 2023 gaot daorumme de deuren van de IJsselhallen dichte. De gemiente is an 't kieken as der argens aanders een neie, kleinere evenementenveurziening ontwikkeld kan wörden deur marktpartijen. Deur de anstaonde sluting van de Iesselhallen giet de Expo Assen, eigendom van Libéma, ok dichte. Volgens Libéma kan 't niet uut umme de Expo Assen zölfstandig deur te laoten dreien.[5][6]

Evenementen[bewark | bronkode bewarken]

  • Boekenfestijn
  • Dutch Darts Masters
  • Lego World (töt 2012)
  • Pasar Malam Istimewa
  • Spellenspektakel
  • Trekkerslep
  • Tuinidee

Uutgaonde verwiezingen[bewark | bronkode bewarken]


Wikimedia Commons Commons: IJsselhallen - plaatjes, filmkes en/of gelüüdsbestanden.

Rifferenties[bewark | bronkode bewarken]

  1. Boeren Burgers Buitenlui: Zwolle Monumenten Magazine 2017, uutgave van de gemiente Zwolle, blz. 44
  2. Bert Evenboer (1990), Neem nou Zwolle... een kleine historie over de ontwikkeling van Zwolle. Deel 2: Oranjebuurt tot Blijmarkt, Evenboer-Boek
  3. Bert Evenboer (1990), Neem nou Zwolle... een kleine historie over de ontwikkeling van Zwolle. Deel 2: Oranjebuurt tot Blijmarkt, Evenboer-Boek
  4. Zwols Historisch Tijdschrift, jk. 11, no. 3, 1994
  5. Rtvfocuszwolle.nl: 'IJsselhallen sluiten eind 2023; Zwolle voert marktverkenning uit voor nieuwe eventvoorziening', 20 juni 2018
  6. Dagblad van het Noorden: 'Expo Assen (TT Hall) sluit de deuren (organisatie te klein nu IJsselhallen in Zwolle dicht gaan)', 9 juni 2020
Dit stok is eschreven in 't Zuudwest-Drèents.