Hotel

Uut Wikipedia, de vrye encyklopedy
Nå navigaty springen Nå söken springen
Grand hotel Wientjes in Zwolle

Een hotel is een dienstverlienend bedrief daoraj teugen betaeling veur ien of meerdere nachten een kaemer mit bedde kunnen kriegen. Hotels wodden miest gebruukt deur toeristen, zaekenreizigers en aandere reizigers die in de plaese in kwestie gien eigen woonruumte of overnachtingsgelegenheid hebben. Et woord hotel komp uut et Oldfraans (h)ostel, laeter hôtel, veur een verzorgingshuus veur bezukers, uut Middelieuws Latien hospitale, harbarg/groot huus, van Latien hospes, vrömdeling/butenlaander/gast.

Hotels wodden onderscheiden van stee-en-stoete (bed and breakfast), wat deurgaons woonhuzen bin waor de eigenaars van de akkemodasie ok zelf wonen, en van de jeugdharbarg, daoraj gewoonlik een slaopzael mit aanderen dielen. Een specifiek soort hotel is et motel (een saementrekking van motor hotel): een niet biester luxueus hotel an de deurgaonde weg. Automobilisten kunnen der overnachten veurdat ze de aandere dag wieder vaeren. Een grand hotel is een groot, luxe hotel, vaeke in een staotig gebouw in treditionele of klassieke bouwstiel.

In en naobi'j de binnenstad van grotere steden vien ie een bulte hotels, mit naeme in de buurte van grotere treinstesjons en vliegvelden. Wat kleinere plaesen hebben vaeke ok wel ien of meer hotels.

Veurzienings[bewark | bronkode bewarken]

Een typische hotelkaemer van een grote keten

Wat een hotel binnen en buten de kaemer an veurzienings hef, hangt dervan of van hoe ienvoldig of luxueus et is. Et antal steerns dat et hotel hef zeg daor wat over. De mieste hotelkaemers hebben wel een kleerkaste, een tillevisie, en Wi-Fi veur et internet. Wieder kunnen der veurzienings zoas een koelkassien en een kluus veur weerdevolle spullen wezen. Kaemers hebben vaeke een eigen badkaemer mit toilet en douche of badkupe, mar et komp ok veur dat disse veurzienings edield wodden mit aandere gasten en buten de kaemer te vienden bin.

Zogenaemde boektielhotels beheuren vaeke niet tot een hotelketen en besteden bezundere andacht an sfeer en inrichting, waorbi'j elke kaemer aanders inericht kan wezen. In een kapsulehotel of pod hotel, een hotelsoorte die aj veural in Japan vienen, slap elke gast in een eigen kapsule daoras wieder niks in past; toilet en doucheveurzienings bin ampart.

Hiel wat hotels hebben een eigen ontbijtzael; gasten hebben dan de meugelikheid om allennig overnachting te boeken of overnachting mit ontbijt. Wat luxere hotels hebben nogal ies veurzienings zoas een zwembad, een restaurant, een zaekencentrum (mit komputers, printers en aander kantoorgerei), kienderopvang, zaelen veur konferensies en evenementen, sport- en fitnessveurzienings en een spa.


Nuvola apps ksig.png Dit stok is eschreven in et Stellingwarfs van de Kop van Overiessel.