Horsterhoek

De Horsterhoek is een darpshuus in het Veluwse darp Vierhouten.

Geschiedenis

Tot 1946 stung d'r op de plaots van de Horsterhoek het pension van de femilie Hop. In 1940 kocht de femilie Ter Horst dit pension mit de biebeheurende groond. In 1946 werd het pension of-ebreuken. Op de vrie-kommen plaots werd in 1953 't darpshuus Horsterhoek ebouwd dat op 10 oktober 1953 feestelijk eopend werd.

Ter naogedachtenis

't Darpshuus was een geschenk van mevrouw Ter Horst-Vogel an de bevolking van Vierhouten. Zie richtte het op ter naogedachtenis an heur zeune Klaos. Klaos (Klaas) ter Horst was in 1940 lid van de De Geuzen in Vlaordingen. De meeste leden van disse verzetsgroep werden deur de Duutsers earresteerd en efusilleerd. Klaos had 'geluk' en kreeg vuuf jaor tuchthuus in Duutsers. Hie leup daor tbc op en werd naor Vierhouten over-ebrocht. Hie störf vlak veur de bevriejing.

Klaos had altied ezeid dat er veur de jeugd in Vierhouten zo weinig te doen was en dat er eigenlijk een onderkommen veur ontspanning en ontwikkeling zol motten kommen. Mevrouw Ter Horst besleut as eerbetoon an Klaos zo’n onderkommen te laoten bouwen. Zie betrok de femilie Hooghordel in de plannen, umdat zie beter op de heugte wanen van wat der in 't darp speulde.

Ontwarp

Al in november 1951 was een veurlopig ontwarp veur het darpshuus emaakt.

Op dit ontwarp wanen onder aandere een grote zaol met podium, een conversaotiezaol, een kleuterschoele, een consultaotiebureau, een cursuskamer, een leeskamer en een kantoortjen op-eneumen. Dit ontwarp is echter nooit uut-evoerd en laoter drastisch ewiezigd, umdat het anvankelijk te groot was. Het darpshuis werd ontwarpen deur architect ir. J.C. Boks uut Rotterdam.

Het erealiseerde gebouw bestung uut een heufdgebouw mit twee verdiepingen en een kelder en had twee zietvleugels van één verdieping hoog. In het heufdgebouw werden op de begaone grond een directiekamer, plees, een garderobe, een bibliotheek en een lokaol veur haandenarbeid en gymnastiek in-ericht. Op de eerste verdieping werd een neilokaol in-ericht. In de kelder is laoter een schietbaon veur de schietvereniging De Katapult an-elegd. In de ziedvleugels werden 't kleuterlokaol en de leskeuken esiteweerd.

Tussen de beide zievleugels was een binnenplein. Naost het darpshuus werd een huus ebouwd veur de directrice en de leidster van de kleuterschoele. 't Huus was in-edeeld mit een gemeenschappelijke gang mit keuken en veur elke bewoenster een zit- en slaapkamer mit douche.

Het Darpshuus werd officieel eopend deur burgemeester H.M. Martens deur het hiesen van de vlagge mit daorop vier bomen (Vierhouten) en de letters O.O.V. (Ontwikkeling, Ontspanning, Vierhouten). Het kinderkoor van Vierhouten, onder leiding van dirigent Willem Reezigt, zung een deur mevrouw Ter Horst-Vogel uut-ekeuzen liedjen. As directrice van het Darpshuis werd mejuffrouw O. de Ronden an-esteld.

Verbouwing

In 1989 werd het darpshuus vergroot waordeur het binnenpleintjen verdween. Tussen de ziedvleugels werd een nieje zaol ebouwd. De ouwe zaol beud plaots an 100 minsen, het nieje gedeelte kan der 230 herbergen.

Ok de tuun bie 't darpshuus werd veraanderd. De muurrestanten van een veurmalig vievertjen, nog daterend uut de tied van pension Hop, werden verwiederd. Veerder werden alle dennen en bomen in de tuun ekapt, um meer ruumte te kriegen.

In hetzelfde jaor as de verbouwing bestung het Darpshuus 35 jaor. Al die jaoren was het darpshuus naamloos ebleven en ze besleuten dat dit maor eens mos veraanderen. D'r werd een priesvraog uut-eschreven veur het bedenken van een naam. De winnaor werd J.J. den Boer die de naam Horsterhoek bedocht. Disse naam verwiest uuteraord naor de femilie Ter Horst. Tiedens de feestelijkheden rond het jubileum op 11 december werd disse naam op een bord onthuld deur L.W. Hooghordel.

Deur de jaoren heen hed 't Darpshuus diverse beheerders ehad, dit waoren o.a.: mej. O. de Ronden (1953-1960), mej. Visscher, mej. Hage, mevrouw v.d. Pol, v.d. Sluis, Henk (Henneman) Berghuis en Jan Pul, Marinus Moret, Kris Kielman (1979-1984) en sinds 1984 tot op de dag van vandaoge Bep en Emile Houtman.

Uutgaonde verwiezingen

• Webstee van 't darp Vierhouten en 't Darpshuus Horsterhoek

Disse pagina is eschreven in 't Vierhoutens