Historische kuuroorden van Europa
De historische kuuroorden van Europa bint elf Europese kuuroorden die op de UNESCO-Wereldarfgoedlieste staot. Tiedens de 44ste bijienkomst van de Commissie veur 't Wereldarfgoed, op 24 juli 2021 in Fuzhou, China, hebt ze dizze kuuroorden op de lieste ezet.
De elf Europese kuuroorden op de Wereldarfgoedlieste[bewark | bronkode bewarken]
- De thermen van Spa in Luuk, België, mit iezer- en koolzoerholdend water; de stad gaf zien name an 't Engelse begrip spa
- Bad Ems in Rienlaand-Palts, Duutslaand, mit bronnen riek an natriumbikarbenaot, waoruut Emser Salz ewunnen wördt
- Baden-Baden in Baden-Württembarg, Duutslaand, in de Romeinse tied Aquae enuumd, in de 19de ieuw zomerheufdstad van Europa
- Bad Kissingen in Beiern, Duutslaand, mit de oldste Kurgarten en 't grootste gehiel an historische kuurgebouwen van Europa
- Vichy in Fraankiek, bekend van 't flessenwater, producten veur de hoed en art nouveau-gebouwen
- Montecatini Terme in Toscane, Italië, mit thermaalwater det goed mut wezen veur de lever en 't spiesverteringsstelsel
- Baden bei Wien in Oostenriek, mit zwevelholdende warmwaterbronnen, in de Romeinse tied bekend as Aquae Pannonicae
- Karlsbad (Karlovy Vary), Tsjechië, in de 18de en 19de ieuw bekend as kuuroord van de hoge adel
- Mariënbad (Mariánské Lázně), Tsjechië, mit koolzoerholdend water en mit gebouwen uut de golden tied van de stad, de 19de ieuw
- Franzensbad (Františkovy Lázně), Tsjechië, in de 14de ieuw bekend as Sauerbrunn, een heelkrachtige bron in 't moeras
- de thermen van Bath in 't Verienigd Keuninkriek, uut de Romeinse tied; diels bint de tempel en de thermen bewaard ebleven
Kenmarken[bewark | bronkode bewarken]
Al dizze steden hebt heur ontwikkeld rond netuurlijke mineraalwaterbronnen. 't Bint getugen van de internationale Europese kuurcultuur die hum ontwikkelde van begun 18de ieuw töt in de jaoren 1930. In dizze tied ontstund een best antal grote badplaatsen, en een soortement stadsbouw mit alderhaand kuurgebouwen: Kurhaus, Kursaal, pompkamers, drinkzalen, zulengalerijen en aandere balneologische infrastructuur. Daorbij heurt wiedere veurzienings as tunen, rizzelveerzalen, casino's, theaters, hotels en villa's. Zukse veurzienings bint integreerd in een stadsgehiel det dieverdaotsie en therapie böd, mit een schier laandschop derumhenne.[1]
Verwiezings[bewark | bronkode bewarken]
|
Dit artikel is eschreven in 't Zuudwest-Drèents. |