Hachiko

Oet Wikipedie, de vraaie enzyklopedie
(deurestuurd vanaof "Hachikō")
Gao naor: navigasie, zeuk
Hachiko in 1935
Hachiko’s op-ezette lief in 't National Museum of Nature and Science in Tokio

Hachiko (Japans: ハチ公) (Odate, 10 november 1923 - Tokio, 8 meert 1935), in 'n Japans ok bekend as chūken Hachikō (忠犬ハチ公 "trouwen hond Hachiko"), was 'n Akita din in Japan heel bekend ewörden is deurdat e noa de dood van zien boasie 9 joar lange wachten op zien weerumme kommen bi'j 't treinstasjon. Noa zien dood wörden veur 't Station Shibuya 'n staandbeeld veur hum op-ericht. De vachte van Hachiko is bewoard ebleven in 't museum van Ueno.

Leven[bewark | bronkode bewarken]

Hachiko wörden geboren op 'n boerderi-je körtbi-j de stad Odate, arns in Japan. In 1924 köchen Hidesaburō Ueno, 'n professor an de Universiteit van Tokio, hum. Din nammen hum met op Tokio an.

Din keerl nammen elken dag de trein op zien wark an van of 't stasjon Shibuya. Rap was 't Hachiko 't gewoon ewörden umme zien boasie elke morn op 't stasjon an te brengen. Woar as e hum middags weer op halen. Disse gewoonte deun ze eankele moanden. Mar, meei 1925 göngen Ueno de tied uut, op zien wark, deur 'n harteverlammig. Zo as aait stönnen Hachiko op hum te wachten op 't stasjon. Mar noe as zien boasie nie meer weerumme kwammen, bleven e 't elken dag weer proberen. Noa 'n zettie wörden Hachiko an 'n ni-je eignaar egeven. Mar doar leupen e vot umme weer op 't stasjon te stoan wachten, óf umme noar 't huus van zien oalde moat te goan.

Deur dat e dit aait mar bleven doen, wörden e al rap bekend bi-j alle luu din daags hen en weer göngen met de trein. Zi-j herkennen hum ok wel as n hond van Ueno. De luu wat hum kenden gaven hum daags te etten. En zi-j verzörgden hum as e gewond ewörden was deur 't vechten met aanderen honden. Iene van disse luu was 'n olde student van Ueno, din toe onderzuuk deu noar 't Akita-rasse. Töt oaver verre was Hachiko bekend ewörden deur de kraanten. leraren en olders nammen Hachiko as veurbeeld as ze de kinder iets oaver de weerde van familietrouw bi-j wollen brengen.

Aals bi-jmekare hef Hachiko nog zo'n 9 joar lange wacht op zien moat. Hi-j göngen uut de tied op 8 meert 1935 op zien vaste plekkie op 't stasjon.

Hachiko wörden noa zien dood op-ezet en stiet vandage n dag in 't National Museum of Nature and Science.

Nuvola apps ksig.png Dit artikel is eskreven in t Sallaands.