Guldensporenslag

Uut Wikipedia, de vrye encyklopedy

De Guldensporenslag vund plaats op 't Groeningheslagveld bi'j Körtriek op woensdag 11 juli 1302 tussen milities van de Graofschop Vlaandern en 't leger van de keunink van Fraankriek. De slag was in militair opzicht opmarkelijk, umdet piekeniers en boogschutters in staot bleken een ridderleger onder de kni'je te kriegen. Dit was daormit aans nog niet 't ende van dizze ridderlegers, zoas onder meer bleek bi'j Kassel (1328) en Westrozebeke (1382).

In historiografisch opzicht is de slag van belang deur de rolle die dizze vanof de 19e ieuw speulden in de Vlaamse bewustwörding en de gruui van de Vlaamse Beweging. Hierbi'j raakten de feodaole, sociaole en economische redens op de achtergrond en kreeg 't conflict een nationaol kerakter. Een belangrieke bi'jdrage an de mandielige bewustwörding van dizze gebeurtenis in Vlaandern leverden ok Hendrik Conscience mit zien roman De leeuw van Vlaanderen (1838), die een geromantiseerd bield van dizze stried gef.

De oaverwinning op 't starkste ridderleger van Europa deur voetvolk betiekenden 't begun van 't einde veur ridders as militaire kaste. Dit hef ok socioale effecten in hiel Europa ehad. Een vergeliekber waopenfeit, allewal op kleinere schaol, had eerder plaatsevunden toen in de Slag bi'j Aone (1227) een leger opstaandige Drenten 't ridderleger van de bisschop van Utrecht uutmoordden.

Dit stok is eschreven in 't Zuudwest-Zuud-Drèents van de Drèents-Oaveriesselse grèensstreek.