Greta Thunberg

Uut Wikipedia, de vrye encyklopedy
Greta Thunberg in määrt 2020

Greta Tintin Eleonora Ernman Thunberg (van den 3. januåri 2003) is ne sweydske miliöö-aktiviste. See is der internationaal üm bekend ewörden dat see wearldleiders uutdaagden üm unmiddellik wat te doon an klimaatverandering. Thunberg völ anvangelik up ümdat se sou jung was en sou rechtuut sunder ümhaal küürden. Dat deade se beide vöär grupen en politike leiders. Dee lätsten deade se nen skuur döär de beyne ümdat see vünd at dee te weinig deaden teagen wat see ne klimaatkrisis nöömt.

Thunberg begün öär aktivisme med öäre olden oaverhalen üm öären leavensstyl an te passen üm de koalstofuutstout weaderümme te dringen. In augustus van 2018, do as see 15 was, satten see sik under skooltyd dale vöär et sweydske parlement, med en bröd med 'Skolstrejk för klimatet' (skoolstaking vöär et klimaat). Al rap deaden andere skolegånde kinder med in öäre eygene gemeynskappen. Med mekander organiseerden see ne skoolstakingsbeweaging vöär et klimaat under de name Fridays for Future (Vrydage vöär et Vöärliggende). Nå at Thunberg in 2018 ne Klimaatveranderingskunferency van de Vereynigde Natys tospröäk, wörden der oaver de heyle wearld wal argens klimaatstakingen hölden. In 2019 warren der meyrdere löseregelde protesten in verskillende städen, wår yder mål meyr as nen miljoon leyrlingen an meddeyden. Üm neet te hoven vlegen, seylden Thunberg når Noordamerika üm de VN-Top vöär Klimaathandelen bywoanden. See hölde dår ne tospråke med de strenge wöörde "How dare you" ("Wo haal y et in den kop"), wat wearldwyd döär de pers upepikked wör en wårvan as heyle musikale bewarkingen emaked wörden.

Döär öäre rappe beklimming van et wearldpodium is see tegelyke ne leidster wörden as en doolwit vöär kritik. Öär invlood up de wearldtop wördt döär de britske krante The Guardian et Greta-effekt enöömd. See hevt al machtig vöäle prysen ewünnen, sou as ne earelidmåtskap vöär de Kring van Köäninglike Skotske Geografiske Gemeynskap, ne vermelding döär Time as eyne van de 100 meyst invloodryke lüde up de wearld, de jungste Time Persoon van et Jår, upname in Forbes' lyste van 100 Machtigste Vrouwlüde en twey upeynvolgende nominatys vöär de Nobelprys vöär de Vreyde (2019 en 2020).