Giesbrogge

Uut Wikipedia, de vrye encyklopedy
Naar navigatie springen Naar zoeken springen

Giesbrogge (Nederlaands: Geesbrug) is een dörp in de gemiente Koevern in Zuud-Drenthe, an de Verlengde Hoogeveense Vaort. 't Hef omdebi'j 720 ienwoners.[1]

Giesbrogge is een ontginningsdörp det in de twiede helfte van de neengtiende eeuw onstund nao de anleg van de Verlengde Hoogeveense Vaort in 't vene van de destiedse gemiente Oosterhesselen. Al de zes broggen aover 't kenaol die as in dizze gemiente laggen, bint eneumd naor 't eerste dörp in de kontreien of naor 't dörp daor as de brogge henne gunk. De plaots die van dizze zes 't varst naor 't westen lag, wordden eneumd naor 't zaanddörp Gies. An dizze brog ontstund een buurtschop die nao de Twiede Wereldoorlog uutgreuiden töt 't dörp Giesbrogge. Veur die tied wordden de plaots Zwinderscheveen, Zwinderscheveld of Giesveld eneumd.

Giesbrogge hef deur zien jonge geschiedenis niet veule olde gebouwen, behalven een enkele monumentale boerderieje. 't Dörp is pas nao de Twiede Wereldoorlog echt töt ontwikkeling ekomen deur de ni'jbouwwiekies die d'r ebouwd bint. D'r bint mar weinig veurzienings: spörtvelden, een openbaore en een protestaants-kristelike basisschoele, een buurtsuper mit postagentschop en een kefé. Wel bint er veule bedrieben op 't bedriebenterrein an de zuudwestkaante van 't dörp, laangs de A37. Daor vien ie onder meer een bouwmarkt en twei pompen. Halverwege 't dörp en 't bedriebenterrein stiet an de lintbebouwing 't kleine mar karakteristieke Nederlaands Hervormde karkien van Giesbrogge uut 1912.

't Laand rondom 't dörp bestiet veural uut laandbouwgebied; an de zuudkaante van 't dörp he'j kleine bosperceelties.

Verwiezings[bewark | bronkode bewarken]

Buten dizze webstee[bewark | bronkode bewarken]

Nuvola apps ksig.png Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.