Gerrit Borgers
Gerrit Borgers (Brummen, 18 september 1917 - Leidschendam, 15 jannewaori 1987) was een Nederlaandse letterkundige.
Borgers was der iene van Jacob Borgers, van Noord-Drèentse ofkomst, en Johanna Hendrika Arendina Mulder, van Limbörgse ofkomst. Hij is op verscheiden plekken in 't laand opegruid. Van 1947-63 was e redacteur van letterkundig tiedschrift Podium. Sinds de oprichting in 1954 was e conservator, later heufdconservator, van 't Nederlands Letterkundig Museum in Den Haag, een instituut gewijd an Nederlaandstalige literaire schrieverije vanof 1750. Van een ienmansbedriefien hef e 't uutebreid töt een schier ehuusvest archief, museum en documentatiecentrum. In 1979 gunk e der vurt en wördden hoogleraar mederne Nederlaandse letterkunde an de Universiteit van Amsterdam; Anton Korteweg volgde hum op bij 't museum. Zien professoraat hef Borgers vief jaor laank beklied.
Borgers schreef aover 't wark van een bulte Nederlaandse schrievers, waoronder Adriaan Roland Holst, Anna Blaman, Simon Vestdijk en Hendrik Marsman. Hij verzörgde 't verzameld wark (1952-56) van de Belgische dichter Paul van Ostaijen, aover wie hij ok promoveerde in 1971.
Organisatorisch was Borgers aordig bij de pinken. An anderhaande literaire organisaties hef e mitehulpen, zoas PEN International, de Stichting voor Vertalingen, 't Willem Kloos-Fonds, de Jan Campert-stichting, de Vereniging van Letterkundigen, 't Fonds voor de Letteren, de Stichting Het Schrijvershuis en Poetry International. Algedurig hef zien doel ewest det der centerije en anfieterpriezen zolden wezen um 't wark van schrievers en dichters veuruut te hölpen.
Bronnen
[bewark | bronkode bewarken]- Oosthoek Encyclopedie
- In memoriam Gerrit Borgers, in Vrij Nederland. Boekenbijlage 1987, deur Anton Korteweg
|
Dit artikel is eschreven in 't Zuudwest-Drèents. |