Gerard Sanderink
Gerhardus Plechelmus (Graads) Sanderink (Weersel, 19. augustus 1948) is nen sakenman uut Twente. Hee sit achter under meyr de bedryve Centric, Strukton un Antea Group, al hevt hee dår niks meyr to vertellen. Nen rechter hevt em ja de macht untsegd ümdat he der niks as dunderye sküppet.[1] De lätste jåren trekket hee vöäral andacht med en paar sleapende rechtsaken teagen em.
Loupbane
[bewark | bronkode bewarken]Med in 2013 når skatting 430 miljoon up de banke is Sanderink multimiljonäär. Et tydskrivt Quote nöömden em in 2000 eyne van de vyvtig rykste lüde van Neaderland.[2]
Sanderink begün up de mulo. Dårnå güng he når de middelbåre landbouwskole in Oldensel, un do voordan når de HLTS in Bolsward vöär ne study in voodseltechnology. As lätste küm hee torechte an de Techniske Hougeskole van Twente in Eanske. As komputerspecialist küm hee in de vleegtüüg- un rüümdevårtbouw, de uutgeaverye un de industry vöär mediske apparaten torechte. In 1978 satten hee med nen kollega, Hans Quellhorst, en software- un uutsendbedryv ICT up.
Uutbreiding
[bewark | bronkode bewarken]Sanderink wolde alleyne voordan. In 1992 begünde hee med de Sanderink Groep. Dat heat seyd 2000 Centric Holding un is eyne van de vöärnaamste anbeders van informatytechnology in Neaderland ewörden. Ouk sit et bedryv in Belgie, Düütskland, Switserland un Noorweagen.
End 2005 kochtden Sanderink et ingeniöörsbedryv Oranjewoud. De 45 miljoon dårvöär leade hee uut eygenen tük up tåfel. By et bedryv warket sou'n 1900 lüde oaver heyl Neaderland. Under dee vlagge kochtden hee bedryve (vake ingeniöörsbüro's) in de VS, Frankryk un Kolombia un voogden dee samen under de name Antea Group. Oranjewoud bleav under de eygene name voordan warken. Ein 2010 löät Oranjewoud weaten at se et bouwbedryv Strukton ekocht hadden.
Dunderye
[bewark | bronkode bewarken]In 2014 begünden de vakbünde FNV Bouw, FNV Bondgenoten un CNV Vakmensen en kort geding teagen Sanderink.[3] See meynden at Sanderink afspraken neet nåleavden oaver cao, pensioon, topbelöäningen un inspráke. Volgens dee afspraken in 2010, nå at Oranjewoud Strukton ekocht had, solde Strukton lid blyven van de warkgeaversorganisaty Bouwend Nederland. De vakbünde verlöären et korte geding: de haagske rechtbanke seade at Strukton neet vannys lid hoovden to worden van Bouwend Nederland.[4]
January 2020 must de neaderlandske regeyring der oaver vergaderen dat verskeidene lüde houge in den boum by Centric der achterhen edån warren of selv egån warren.[5] Centric beheyrt vöäle informatytechnology van de neaderlandske oaverheid, med gevölige informaty oaver börgers un ambtenåren. Et opstappen un untslag van de houge heyren solde to maken hebben med de vorholding van Sanderink med selvverklård cyberkenner Rian van Rijbroek. See bemoiden sik med et bedryvsbestüür un dat stünd öär neet an. Ouk warren der bewüst vöärname dinge wisked van Sanderink synen telefoon, soudat rechters der niks meyr med kunden, solde neet passen by syne rulle binnen Centric.[6]
Sanderink was eyrder al trouwd med Brigitte van Egten. See was ouk leidinggeavende binnen dree van syne bedryve. Ouk was see bestüürslid van de Sanderink Stichting, dee as oaver syn vermöygen geyt. Do as see et nöst under den boum hadden in 2018 begünde Sanderink Van Egten van vanallens swart to maken. Der wördt emeynd at Van Rijbroek em dat sou inflüsterden.[7][8] Van Egten klaagden Sanderink an vöär smaad un laster. December 2020 geböyd de rechtbanke Sanderink dat he €100.000 de oavertreading de dag must betalen an dwangsumme.[9] Sanderink hölde sik neet an de rechterlike uutspraken. Ende november 2021 must hee dårümme van de rechtbanke souwat twey miljoon euro an dwangsummen betalen an Van Egten.[10]
Torügtrekken, weaderkeyr un nye skorsingen
[bewark | bronkode bewarken]January 2021 tröäk Sanderink sik torügge as topman by Centric, Oranjewoud, Strukton un de Antea Group.[11] Eygener un groutandeylholder bleav he anders wal.[12] Al nå en paar wekke vröägen andere kommissarissen van Oranjewoud em üm weader to kummen. Sanderink had ja 98% van de andeylen, un se musten noch wal med em oaverleggen.[13]
Oktober 2021 küm Sanderink ouk weader torügge by Strukton as CEO. Erik Hermsen, den as Sanderink syn wark had edån do as hee vord was, had den kråm inepakked un et bedryv verlåten.[14]
En jår later, in 2022, küm hee ouk weader by Centric weader.[15] Twey bestüürslüde hadden sik torüggetrökken. Dat wör bekend in oktober 2022, un rap beslöät et Oupenbår Ministery dat se Sanderinks herbenöming ungedån makeden döär et Recht van Enquête in to setten, en deepgånd undersöök når de gang van saken. As Centric neet med solde warken, solde justity de Underneamingskamer van et Gerechtshof Amsterdam der by halen.[16] Dat deaden se ümdat der rüste in et bedryv must kummen. Et bedryv warket ja vöär vöäle oaverheidsinstellingen.
Den Råd van Bestüür van Centric reageerden neet up 24. oktober 2022 un et Oupenbår Ministery haalden der de Underneamingskamer by.[17] 3. November 2022 löäten dee Sanderink subyt skorsen as bestüürsman. Eyn andeyl in et bedryv möäg hee noch holden.[18] Sanderink wör an de kante sat as bestüürder. Der kümmen nen uutvorend un neet-uutvorend bestüürder vöär in de steade.[19] Up den 31. january 2023 wör Sanderink ouk et lätste andeyl afenöämen.[20] De Underneamingskamer hevt gröön lecht egeaven üm et bestüür van Centric es teagen et lecht to holden.
Up den 17. määrt 2023 wör bekend emaked at Sanderink ouk eskorsd was as CEO van Oranjewoud un Strukton un allens wat dår under vöäl.[21][22] Dat solde eyrst ne skorsing van dree månd weasen, mär ende april vrögen de kommissarissen van de beide bedryven of et neet länger kunde. De bedryven hadden ja rüst un stabiliteit nöydig.[23]
Den 1. juni nöäm de Underneamingskamer Sanderink de heyle seggenskop oaver Oranjewoud un Strukton af. Ouk syne andeylen kummet under beheyr van ne wårneamende partye. Hee mag selv syne andeylen to koup setten, mär möägelike köypers kryget pas stemrecht in de bedryven as den Underneamingskamer et goodköärt. Dat doot se pas as se den nyen köyper eyrst vulleydig döärelichted hebbet. Dat maket de andeylen heyl wat minder waerd. [24]
Den 19. november küm RTV Oost med et nys at Sanderink syn olde bedryv Centric noch 80,6 miljoon euro van em weader wolde hebben. Dat had Sanderink in coronatyd van et bedryv eleynd.[25] Määrt 2024 was dåroaver ne nye rechtssitting, mär Sanderink küm neet updagen. Der wör upperd at Sanderink syne andeylen in Centric of Strukton verkoupen kun üm syne leyning af to lössen.
Persöönlik
[bewark | bronkode bewarken]Sanderink trouwden up den 2. january van 2023 med Rian van Rijbroek.[26]
Verwysingen
[bewark | bronkode bewarken]- ↑ Joram Bolle, Ondernemingskamer stelt onderzoek in naar jarenlange bestuurssoap bij Centric. volkskrant.nl (27 januari 2023). Bekeaken up 31. januari 2023.
- ↑ Gerard Sanderink. Quote.nl. Bekeaken up 19 april 2014.
- ↑ Eigenaar Strukton voor rechter. RTL Nieuws (5 määrt 2014). Bekeaken up den 22. november 2020.
- ↑ Strukton mag van rechter uit Bouwend Nederland stappen', Vastgoedjournaal 29. april 2014.
- ↑ Omtzigt stelt kamervragen over commotie in bedrijven sanderink. destentor.nl. Bekeaken up 20. mei 2021.
- ↑ Experts: losgeslagen Sanderink vraagt om daadkracht rvc. FD.nl. Bekeaken up den 20. mei 2021.
- ↑ Wie kroop er in het hoofd van miljonair Gerard Sanderink?. Tubantia. Bekeaken up 19. mei 2020.
- ↑ Verblind door een cybercharlatan. Follow the Money - Platform voor onderzoeksjournalistiek (18. mei 2019). Bekeaken up den 22. november 2020.
- ↑ Marieke de Ruiter, Verscherpt toezicht commissarissen op Strukton-topman Gerard Sanderink. de Volkskrant (30. december 2020). Bekeaken up 20. mei 2021.
- ↑ Sanderink moet ex-vriendin bijna 2 miljoen euro betalen, NRC Handelsblad, 25 november 2021.
- ↑ Alfred Monterie, Sanderink stopt als topman van Centric. Computable (4 january 2020).
- ↑ Twentse ondernemer Gerard Sanderink is uithangbord-af, maar nog niet weg, de Volkskrant, 5. januari 2021.
- ↑ Sanderink terug bij Oranjewoud, ondanks incidenten, NRC Handelsblad, 26. january 2021.
- ↑ Sanderink terug bij Oranjewoud, ondanks incidenten, NRC Handelsblad, 26. january 2021.
- ↑ Sanderink weer aan de slag als topman Centric, twee bestuurders weg, RTV Oost, 19. oktober 2022
- ↑ OM stelt deadline aan Centric: draai benoeming Sanderink terug, NRC, 20. oktober 2022.
- ↑ OM zet volgende stap om Sanderink af te zetten, NRC, 24. oktober 2022.
- ↑ Omstreden ondernemer Sanderink geschorst als topman IT-bedrijf Centric. RTL Nieuws (3. november 2022).
- ↑ "Gerard Sanderink per direct geschorst als bestuurder Centric", BNR, 3. november 2022.
- ↑ Sanderink verliest ook laatste aandeel in Centric. Binnenlandsbestuur (31 januari 2023). Bekeaken up den 28. february 2023.
- ↑ Raad van Commissarissen Oranjewoud NV en Strukton NV neemt per direct leiding over, website Strukton, 17. määrt 2023.
- ↑ Gerard Sanderink nu ook geschorst als topman bij Oranjewoud en Strukton, NOS Nieuws, 17. määrt 2023.
- ↑ Strukton en Oranjewoud willen topman Sanderink 'voor langere tijd' weg hebben, NOS Nieuws, 27. april 2023.
- ↑ NOS.nl. "Ondernemingskamer neemt Sanderink ook Strukton en Oranjewoud-af Uutgeaven un bekeaken up den 1. juni 2023.
- ↑ Rtvoost.nl - miljonair gerard sanderink verder in de problemen: Centric eist 80 miljoen euro terug Skreaven up 19. november 2023. Bekeaken up 20. november 2023.
- ↑ Multimiljonair Sanderink getrouwd met omstreden vriendin Rian van Rijbroek. Algemeen Dagblad (12. january 2023).