Fortnite

Uut Wikipedia, de vrye encyklopedy

Fortnite is en online videospel van Epic Games, vöär et eyrst uutebracht in 2017. Et is te spöälen in dree spelvarianten, dee deselvde basis hebbet: Fortnite: Save the World, Fortnite Battle Royale en Fortnite Creative. In den eyrsten, Save the World, verdeadiget töt veer lüde samen en antal torens teagen zombie-achtige skepsels en beskarmet vöärwarpen döär der välle en verstarkede müren ümhen te bouwen. Fortnite Battle Royale is gratis te spöälen battle royale-spel wår as töt 100 spöälers vechtet töt den lätsten oaver is. In Fortnite Creative kryget spöälers alle vryheid üm selv wearlden en vechtarena's te bouwen. Save the World en Battle Royale kümmen uut in 2017, Creative in 2018. Save the World draiden up Windows, macOS, PlayStation 4 en Xbox One, Battle Royale warkeden up al dee platförme mär ouk up Nintendo Switch, iOS en Android-apparaten. Ouk vöär volgende generatys PlayStation 5 en Xbox Series X/S-bestüringen kümt et uut.

Save the World en Creative draiden good vöär Epic Games, mär et is vöäral Fortnite Battle Royale wat unwys vöäle spöäld wör oaver de heyle wearld. Dat hevt der vöäral med te maken dat et gratis te spöälen is, mär ouk döärdat et makkelik up klookfoons draien deade en et grafisk neet te angrypend was, wårdöär en jöögdig publik et kunde spöälen. Binnen en jår tröäk et spel meyr as 125 miljoon spöälers en haalden dårmed hunderden miljonen an euro's de månd binnen. Et wör en kultureel fenomeen, wårby as vöäral teeners heyle dage satten te spöälen en de typiske danskes dee as karakters uut et spöl mangs doot, in et echt nådeaden.

De readen at der souvöäle geld in ümme geyt is dat der bedryve reklame in et spel magt invoren, mär ouk ümdat spöälers vöär en klein bedrag bepålde kleyder en panzer köänet bykoupen.

Inmiddels wordet der heyle esportwedstryden med Fortnite espöäled, wårin as höyvdpryse töt in de miljonen loupet.