Erik Hulzebosch

Erik Hulzebosch (Anervenne, 17 juni 1970) is nen Sallaandsen zänger en presentator den't vroger profesjoneel skaatsenriedn deed. In 1997 wör he zeen as grötsten kaanshebber bie n Elfsteadntocht, mer doar wör he oeteandelik tweedes. Tien joar doarnoa wun he de finale van So You Wanna Be a Popstar? Rechtevoort dut he zingn en is he in te huurn as sprekker.

Leawn

Hulzebosch is viefde keend oet n gezin van zesse. Umdet he as kleainn slim stottern deed, haaln he op skole ginne hoge siefers. Hierumme gung he met 14 joar van skole, woernoa't he kraanmasjinist wör. Vuur at he met skaatsen begun, wun he al mear as 300 wedstriedn fietskrosn. 1985 deed he, oonder zin breur's naam, met an n darteenden Elfsteadntocht. Hiernoa gung he aal mear richtn op Marathonskaatsn, woermet he in 1987 vuur t eerst Neerlaands Kampioen wör, en in 1990 nog es.

Elfsteadntocht 1997

t Volk zaggen Hulzebosch gearne winn, mer klook spöln kon he neet best. In 1997 was he favoriet um te winn, noadet he al twee grote klassieke ritn ewunn har. Op n lestn knieperd wör he krap an versloan duur Henk Angenent. 's Aanderndeagns vreug um Willibrord Frequin Angenent toch nog te versloan op de Bonkevoart. Doar deed Angenent roeien. Hulzebosch haaln um doar in met nen speedboot. Ondaanks at Hulzebosch tweedes wör, wus hee dr toch wat oet te haaln. Detzelfde joar har he nen karnavalsnommer op enömn, wat ne hit wör.

Seend dee tied keump Hulzebosch regelmoatig vuur de radio en tellevisie, en is he in te huurn as sprekker bie evenemeantn. Nöast zelf metskaatsn har he ne eegne Marathonskaatsploog en n andeel in t bedrief Maple Skate. An zinne skaatsloopbaan köm op 27 januwoari 2010 n eande..

Zingn

In 2007 wun Hulzebosch t SBS6-programma So You wannabe a Popstar? Zin nommer Extase (zonder jou), ne lyriese ballade met nen solo dr in van nen saxofoon, wör noa de finale-oetzeanding as CD oet egeewn. In augustus van det joar wör zin nommer Geloof me oet egeewn en in oktober zin album Zwart ijs.

6 Januwoari 2009 treud Hulzebosch vuur t eerst met zin nieje nommer Gun jezelf de ruimte op. Dit wör vuur um eskreewn duur Jurren Schoonbeek (n tekst) en Kees Kuiper (de muziek) en is ne lofzaank oawer de gemeente woer't he wont.

Tellevisie

Hulzebosch kreeg op 24 juni 2009 n eegne tellevisieprogramma bie RTV Oost, Met hulzebosch de hort op, woerin't he bekeande Neerlaanders opzöch en oondervreug.

Perseunlik

Hulzebosch woont in de boerskop Loozen, kort bie Gramsboargen in de gemeente Hardnboarg. Hee is etrouwd met skaatsenriedster Jenita Hulzebosch-Smit.

Earelieste

2007

• Winnaar So you wannabe a popstar (SBS6)
• 1e World Grand Prix Zweedn] 150 km

2003

• 1e Open NK Weissensee 100 km

1996-1997

• 2e Viefteende Elfsteadentocht 200 km (4 januwoari 1997)
• 10e NK natuuries Aankevenne 100 km (30 desember 1996)
• 1e Holland Venetië Giethoorn 50 km (29 desember 1996)

1995-1996

• 9e NK natuuries Ermerstrand 100 km (2 januwoari 1996)
• 2e Holland Venetië Giethoorn 100 km (31 desember 1995)
• 12e Eernewolde 100 km
• 1e Veluwemeartocht Elburg 100 km
• 7e Oldambtrit Scheemda 100 km
• 1e Amstelmearmarathon 100 km

1993-1994

• 1e NK natuuries Maaslaand 100 km

1990-1991

• 1e Open NK Plansee 100 km

Discografie

Lösse nommers

Singels in n top 40 van Neerlaand	Oetgefdoatum	Inkomdoatum	Heugste plek	antal wekn	Opmoarkingn
Hulzebosch Hulzebosch	1997	1-2-1997	15	5	met Fokko Dam
Foie foie foie / Ik vin oe sexie	1998	17-1-1998	tip		met Fokko Dam
Extase (zonder jou)	23-5-2007	2-6-2007	7	7
Geloof me	6-8-2007	18-8-2007	27	2
Zo zijn wij	22-10-2007				duet met Maud
Gun jezelf de ruimte	06-01-2009	06-01-2009			met Jurren Schoonbeek / Kees Kuiper

Albums

Albums in de hitliestn van Neerlaand	Oetgefdoatum	Inkomdoatum	Heugste plek	antal wekn	Opmoarkingn
Zwart ijs	22-10-2007

Oetgoande koppelink

• Offisjele webstea