Doowop

Uut Wikipedia, de vrye encyklopedy
Nå navigaty springen Nå söken springen
Disambig-dark.svg Kiekt hier veur aandere betiekenissen van Doowop.
Doowop-ensemble The Ravens in de jaoren 1940

Doowop (Engels: doo-wop) is een soortement rhythm-and-blues. Kenmarken bint a capellazang mit een melodie die oe grep, en een ienvoudige maot mit weinig of gien instermentatie. De stiel kwaamp in de jaoren veertig van de twintigste ieuw op onder Afro-Amerikaans jongvolk en Italiaanse immigranten in de steden in 't noordoosten van de Verienigde Staoten. 't Was een mengeling van zunder instermenten espeulde jazz, a capellameziek, scat (stemimprovisaties in de jazz) en opera. Vake haj een achtergrondkoortien det ritmische woorden of onomatopeeën zunder wiedere betiekenis zunk, waor ok de name van de stiel van kump. Doowop was toegaankelijk umdej der gien instermenten bij neudig waren, en bracht massa's tieners dertoe um a capella-groepies op te richten.

Doowop deuden ze in Europa niet veule an, mar de Duutse band de Comedian Harmonists (actief van 1927 töt 1934) kuj in die hoeke zuken. Nao een pieke in de jaoren vieftig waren mèensen in de jaoren zestig weer wat minder drok op de stiel. Uut de doowop ontstund in de late jaoren zeuventig de beatboxerije.

Invloed van de doowop kuj weerummeheuren in de surfrock van The Beach Boys, de hits van de Four Seasons, de teenybopper-variaanten van de rock-'n-roll van end jaoren vieftig (What Do You Want to Make Those Eyes at Me For? van Emile Ford & the Checkmates) en midden jaoren zeuventig (Sugar Baby Love van The Rubettes) en close harmony-groepen uut de jaoren tachtig zoas The Deep River Quartet en The Flying Pickets.

Kenmarkende zinnen:

  • shoo-wap-dee-wap-wap
  • showaddywaddy en variaant bob-shu-waddy
  • dun dun dun dun
  • ne ne ne ne ne
Nuvola apps ksig.png Dit artikel is eschreven in 't Zuudwest-Drèents.