Diezerpoorte (stadspoorte)

Aquarel van de Diezerpoorte deur Alexander Oltmans (1814-1853), emeuken toen de poorte al vurt was

Kiek in de Diezerstraote vanof de Diezerpoorterbrogge. In de stadsmure ziej de ronding van de vroggere Diezerpoorte

De Diezerpoorte was een stadspoorte uut ongeveer 1475 in de stadsmure van Zwolle. De poorte stund op de plekke waor de Diezerstraote, vandage de dag de belangriekste winkelstraote van de stad, uutlöp op de Diezerpoorterbrogge. In 1828 en 1829 hebt ze de Diezerpoorte ofebreuken, en tegenwoordig herinnert der allennig de lienden in 't wegdek nog an. Ok vien ie de anzet veur de poorte in de vörm van een ronding terogge in 't stok stadsmure dernaost det nog in 't ende stiet.

Op de poorte stund een bield van de schutspetroon van Zwolle, Sunte Michaël. Dit bield is bewaard ebleven en is now te zien in de Basiliek van Oonze-Lieve-Vrouwe-ten-Hemelopneming (de karke van de Pèperbusse).

De woonwiek Diezerpoorte buten de stadsgrachte is vernuumd naor de poorte, mar stiet vanolds ok bekend as de Dieze of de Nijstad.

Diezerpoortenbolwark (Badhuiswal)

Buten de Diezerpoorte haj 't Diezerpoortenbolwark, een raveliene oftewal viefhoekig verstarkt eilaand an de butenkaante van de stadsmure. Mit dit verdedigingswark bint ze véur 1606 estart. Mit 't dernaost elegen Den Genverbergbolwark had 't Diezerpoortenbolwark de take um 't naodern van de vijaand via de Neie Wetering (now 't Almelose Kenaal) te stoppen. Wieder had 't samen mit 't now niet meer herkenbere Tanerijbolwark de take um de toegaank töt de binnenstad via de buurtschop Dieze te verdedigen.

In 1842 deu Everhardus T. Schaepman op de grond van 't veurmaolige Diezerpoortenbolwark een badhuus lös, waor volk uut 't hiele laand op of kwaamp. Op de gevel stund 'Arti Salutiferae' (An de heilbrengende geneeskeunst). Dizze plekke was veur 't badhuus ekeuzen zodet mit schoon revierwater de baden evuld kunden wörden. 't Badhuus had een streng medisch regime. Op vaste tieden mussen de badgasten een kuiertochien maken, een glas bronwater drinken, een middagduttien doen en verscheiden soorten baden nemen.

Nao de dood van Schaepman naamp de femilie 't badhuus in gebruuk as woonhuus. De grond van 't vroggere bolwark is vandage de dag bebouwd mit woonhuzen en winkels. 't Straotien det der löp, het de Badhuiswal.

Bronnen

• Infermatiebrödties an de stadsmure en bij 't vroggere Diezerpoortenbolwark
• Jan ten Hove (2005), Geschiedenis van Zwolle, Zwolle: Historisch Centrum Overijssel
• MijnStadMijnDorp: Badhuiswal - Baden voor je gezondheid

Dit artikel is eschreven in 't Zuudwest-Drèents.