Delia Bremer

Delia Bremer ('t Ogeveine, 1969) is een Drèentse schriefster, dichteres, tiekenaar, daanseres en plastisch keunstenaor. Ze rönt wat ze nuumt een 'eenwijfsbedrijf' onder de name delibre.

Daans

Bremer treedt riegelmaotig op in samenwarking mit meziek- en daansschoelen; heur daansstijl holdt 't midden tussen mederne daans en tai chi. Artiesten daoras ze mit in de maande hef ewarkt bint onder aandern Vicky Brown en Jan Vayne.

Bieldende keunst

As schilderes gebruukt Bremer bi'j veurkeur acrylvarf op panelen of doek, mit diverse onderwarpen, strakke vörms en lienden en primaire kleuren. Veur kiender van gescheiden olders beschildert ze koffers mit een persoonlijk verhaal.

Ok exposeert ze mit riegelmaot heur keunstwarken die bint emeuken mit materiaol as iezerdraod, holt en pepier.

Schriefwark

Bremer hef liedteksten eschreven veur de Stichting Drentse Muziek Maatschappij. In 2006 kreeg ze de pebliekspries van 't literaire evenement 'Lief' in Hasselt, België.

Heur vri'je gedichten beschrieft ervarings vanuut een ik-figuur en gaot over verlangst, lichamelijkheid en de teleurstellings van ewunnen en verleuren liefde.

In 2009 kwaamp bi'j Het Drentse Boek Minnezinne uut, een bundel mit een kleine vieftig erotische gedichten die ze mit Ria Westerhuis hef eschreven. De bundel maakten hiel wat lös; d'r wördden in een jaor tied zowat duzend exemplaren van verkocht, en de schriefsters kwamen op de laandelijke tillevisie. Bremer en Westerhuis schreven beiden al vaker licht erotische gedichten, al dan niet in 't Drèents, daoras ze mekare mit uutdaagden, mit as risseltaat dizze bundel.

Daans en dichtwark combineert Bremer mit heur uutvoeringen 'daans-op-dicht'.

Aandere activiteiten

Bremer prissenteert een pregramma oaver keunst en cultuur bi'j Radio De Wolden. Wieder hef ze boekumslagen ontworpen en een steugien freelance-journalist ewest bi'j de Hoogeveensche Courant.

Uutegèven wark

• Hemelkind (dichtbundel, 1992)
• Een koe met schaatsen aan (kienderboek, 2000)
• gebundeld (ge) dicht (verzameldichtbundel, 2001)
• Woordsprongen vanuit een kindermond (kiendergedichten, 2004)
• Grand Cru (gedichten oaver verloren en gewunnen liefde, 2007)
• Hart & Zacht (verzameldichtbundel, 2008)
• Minnezinne (erotische gedichten, mit Ria Westerhuis, 2009)

Bronnen

• Het Drentse Boek oaver Delia Bremer
• De webstee van Delia Bremer