Darten

Pylen up en dartbord

Darten is nen sport wårby as twey teagenstanders eyne vöär eyne med dree kleine pylkes (de darts) up en rund dartbord smyten müt.

Et bord is verdeyld in väkkes rund en middenpunt, med allemål ne verskillende püntenwaerde. An et begin van et spel hevt yderen spöäler 501 of 301 punten, afhangelik van wat se vöäraf beküerd hebbet. Döär de pylen klook in de verskillende väkkes to smyten, nemt et antal pünten af. Wee as as eyrste uutgooit (d.w.s. alle punten kwyt is), wint et spel. Üm et lastiger to maken, müt de lätste smette in den butensten ring landen (wat dübbele waerde gevt). Dat kost anders noch wal höyvdrekkenen.

Et is nen typisken kroogsport, wat is uutedacht up de britske eilanden. Vandår dat de meyste termen ouk in et engelsk sint. De regels van de sport wordet vastelegd döär de World Darts Federation (WDF).

Et bord

Ne vöärstelling van en dartboard, med puntenwaerdes der by

Volgens de officiele regels müt en bord rund weasen un 451 millimeter in döärsneyde. De borden wordet meysttyds emaked van sameneparsked sisal of kork. In de midden van et bord sit ne roude stippe, den bullseye, (et bullenouge) wat 25 punten upleyvert. Dårümhen sit nen grönen kring, den dubbelen bullseye, den as 50 pünten upleyvert. Van dåruut is et bord verdeyld in twentig radialen.

De waerdes van de 20 radialen sint neet lykmåtig oaver et bord verdeyld. Den 20 sit middenvöär boavenan, mär de 19 sit linksunder net uut de midden. Den butensten ring (den double) up en dartbord leyvert ne verdubbeling van de punten up. Den middensten ring (de triple) ne verdreevoldiging.

De underverdeyling hevt de WDF nu oficiääl vastelegd, mär leyverden vroger noch wal es disterye up. Et hüdige stelsel wördt toodicht an nen timmerkearl uut Lancashire, Brian Gamlin, den as et uutdachten in 1896 üm dårmed slechte wörpe af to straffen. Of et wår is is en tweyden. De verdeyling is altyd al verskillend eweasd oaver tyd en steades. Rekkenkündig bekekken is de hüdige indeyling noch neet sou verkeyrd un hebbet spöllers by et missmyten noch de meyste kans üm noch wat to raken wat nit to slecht is. Et beste dartboard, dår sint heyle undersöke når edån.

Volgens de officiäle WDF-reagels müt en dartbord up 1,73 meter höygde hangen, emetten vanaf den bullseye.

De pylen

Darters gebruket döärgåns pylen van ungeväär 15 töt 20 centimeter lange. Se wordet rechtevoord meysttyds emaked kopper of metaalallooien, en beståt uut ne pünte, et lyv (barrel), nen skacht un nen start med dree of veer plastik vlöägels. Et lyv hevt vake nen torpedo-form, den dikke is by de pünte en når achteren hen taps toolöpt.