Naar inhoud springen

Christiano Ronaldo

Uut Wikipedia, de vrye encyklopedy
Ronaldo in 2017

Cristiano Ronaldo dos Santos Aveiro GOIH ComM (Portugeyske uutspråke: [kɾiʃˈtjɐnu ʁɔˈnaɫdu]; geboaren up den 5. february van 1985) is nen betaald vootballer uut Portugal. Hee spölt as anvaller un is anvoorder van et nationale manskap van Portugal.

Ronaldo wördt eseen as eyne van de beste vootballers ooit. Hee hevt vyv Goldene Bälle un veer Europääske Goldene Skone wünnen, et meyst van Europa. Hee hevt 34 bokalen up name, wårunder söäven divisytitels, vyv UEFA Champions Leagues, Et UEFA Europääske Kampioonskop un de UEFA Nations League. Hee is rekordholder van de meyste wedstryden (183), doolpünten (140) un skorende vöärsetten in de Champions League (42), doolpunten in et Europääske Kampioonskap (14), internationale doolpünten (118) un hevt allens by mekander et meyste medespöld up internationale wedstryden (196). Hee is eyne van de weinige spöllers dee an meyr as 1100 betaalde wedstryden med edån hebbet un hevt meyr as 800 mål raak esköäten vöär klubs un syn land. As eanigsten spöller van de wearld hevt hee in vyv FIFA Wearldkup-wedstryden eskoord.

Ronaldo is eyne van de bekendste sportlüde van de wearld, med dikke reklametoslage vöär sportmarken en -skone. Forbes beskrivt em as den höygst-betaalden sporter van 2016 en 2017. Hee is den eyrsten vootballer en darden sportman van de wearld den as meyr as 1 miljard dollar verdeend hevt.

Loupbane[bewark | bronkode bewarken]

Syne betaalde loupbane begünde by Sporting CP. Al rap kreag hee en kontrakt by Manchester United in 2003, do as hee 18 was. Hee wün syne eerste FA Cup in syn eyrste seisoon. Hee wün ouk dree achtereynvolgende Premier League-titels, de Champions League un de FIFA Club-wearldbeaker.

Synen oaverstap når Real Madrid in 2009 was den töt-dan-to düürsten ooit, hee setten de handteykeninge vöär nen prys van € 94 miljoon. By Real Madrid wör hee underdeyl van et anvallende dreetal med Karim Benzema en Gareth Bale, dat de byname BBC kreag. Döär öär wün et manskap van 2014 töt 2018 alle Champions League-titels. Med 23 jår wün hee synen eyrsten Goldenen Bal. In disse tyd wün hee ouk twey mål achter mekander den Goldenen bal in 2013 un 2014, un noch es in 2016 en 2017. Dree mål müst hee Lionel Messi vöärlåten, den as wyd eseen wördt as synen grötsten rivaal. Hee wör twey mål topskoorder alle tyden, vöär Real Madrid un van de Champions League. Dat was nådat hee vöär ses mål up de ryge, van 2012 töt 2018, et vaakst raak had esköäten van dat wedstrydverband. Med Real Madrid wün Ronaldo twey La Liga-beakers, twey Copa del Reys, veer UEFA Champions League-beakers, dree UEFA Super Cups en dree FIFA wearld-klubkampioonskoppen.

In 2018 kochteden Juventus em oaver vöär € 100 miljoon, den düürsten transfer vöär nen italiaansken klub un nen spöäler boaven de 30 jår ooit. Hee wün twey Serie A-beakers, twey Supercoppa Italiana-trofeen en nen Coppa Italia, wör den Waerdevulsten Spöäler van Serie A en was den eyrsten vootballer den as der as topskoorder uutküm in de engelske, spaanske en italiaanske liga's, vöärdat hee in 2021 weaderküm by Manchester United in 2021. Dår vertröäk hee do as in 2022 syn kontrakt untbünden wör.

Syn internationale wedstryden med Portugal begünde hee in 2003 do as he 18 was. Hee hevt 190 wedstryden mededån. Dårmed is hee nu Portugals vaakst-spöälende spöäler. Med meyr as 100 internationale doolpünten is hee ouk den besten skoorder van alle tyden in syn land. Ronaldo hevt medespöäld un raak esköäten in 11 groute wedstrydverbände: syn eyrste goale was by Euro 2004, wår hee Portugal når de finale hülp. In juli 2008 wör hee anvoorder van et manskap. In 2015 wör köäs de Portugeyske Voodbalfederaty em as besten portugeysken vootballer van alle tyden. Et jår der up leidden hee Portugal når de eyrste groute oaverwinning in Euro 2016. Togelyke wün hee hyr de Silverne Sloffe as den eyn-nå-besten skütter van et tuurnooi. Dårmed was ouk synen veerden Goldenen Bal binnen. In de FIFA Konfederatykup van 2017 leidden hee Portugal nå ne darde steade, når de winst in de UEFA Nations League in 2019 (wårby hee weader topskoorder was in de finale) un kreag de Goldene Sloffe as topskoorder van Euro 2020.

Persöönlik[bewark | bronkode bewarken]

Christiano Ronaldo wör jung in Funchal, de höyvdstad van et portugeyske eiland Madeira.

Hee had ses kinder. Eyrst kreag hee nen söäne, den geboaren is up 17 juni 2010 in de Vereynigde Ståten. Hee hevt vulleydige seggenskop oaver et kind, mär hevt med de moder afespröäken dat hee niks löslöt oaver öäre identiteit un van et kind. In januari 2015 had Ronalde et nüst under den boum med russisk model Irina Shayk.

Hee is vader van nen tweyling dee up 8 juni 2017 geboaren wörden in de Vereynigde Ståten, via nen draegmoder. Up et ougenblik hevt hee verkeyring med et spaanske model Georgina Rodríguez, wårmed hee seyd 12. november 2017 ne dochter hevt. Et koppel verwachteden ne tweyde tweyling in 2022. En jünken oaverleavden de geboarde neet, et määdken wal.

Ronaldo syn vader José küm in 2005 uut de tyd döär nen anetasteden leaver van et supen do as den 52 was. Ronaldo was do 20 jår old. Et kan good dårümme weasen dat Ronaldo når eygen seggen gin alkohol drinkt. Do as et britske blad The Sun skreav dat hee hagelkeiendikke eseen was tydens syn herstsel van ne blessure, klaagden hee se subit an.

Vrygeavigheid[bewark | bronkode bewarken]

Ronaldo doneert reagelmåtig blood en beynmarg. Ouk steyt hee bekend as eyne den as reagelmåtig geld doneert, byvöärbeald nå den Tsunami in den Indisken Oceaan van 2004, of 5 miljoon britsken pund vöär reddingswark by den aerdbeaving van Nepal in 2014. Do as en sekenhuus in Madeira syn moder wüst te redden van kanker, doneerden hee et sekenhuus 100.000 britsken pund. En nå at hee nen smaadsake teagen The Sun had ewünnen, gavven hee et unbekende bedrag wat The Sun em must betalen an en leefdådigheidsinstelling up Madeira. In 2016 wün Ronaldo € 600.000 an bonus vöär et winnen van de Champions League. Dat geld doneerden hee vulleydig an gode dolen.

Wyders set Ronaldo sik in vöär erkenning en verbeatering van de slechte ümstandigheiden van indonesiske mangrovebusken en is hee ambassadöör vöär Save the Children.

Rechtsaken[bewark | bronkode bewarken]

In 2017 beskuldigden de spaanske belastingdeenst Ronaldo van belastinguntdüking. Tüsken 2011 en 2014 solde den vootballer noch € 15 miljoon an de latte hebben. Ronaldo must vöär twey jår et huk in en kreag der noch ne boote by van €18,8 miljoon, wat later torüggedraid wör töt € 16,8 miljoon nå nen oavereynkumst. De gevangenisstraffe was vöärwaerdelik.

Ouk hebbet en paar vrouwlüde Ronaldo aneklaged vöär verkrachting, mär dat is nooit beweysen.