Casino

Uut Wikipedia, de vrye encyklopedy
Nå navigaty springen Nå söken springen
Marina Bay Sands, een casino en dieverdaotsiecomplex in Singapore det in 2010 de deuren lösdeu
Een roulettetaofel in Las Vegas

Een casino (Italiaans veur 'klein huus') is een uutgaonsgelegenheid veur bepaolde soorten gokkerije. Casino's bint nogal ies ecombineerd mit een hotel, een restaurant, winkels enzowieder. Sommige casino's biedt ok vermaak zoas stand-upcomedy en live-meziek.

Soortementen spöl[bewark | bronkode bewarken]

Bezukers van casino's kunt winst of verlies maken deur geld in te zetten op spöllen as roulette, blackjack, baccarat en craps, of deur te speulen op fruitmesienes en automaten veur beveurbield videopoker. Waj in casino's viendt, bint kaansspöllen: oj wint of verliest, hangt dervanof oj gelok hebt. Bij sommige spöllen is daornaost ok de knieftigheid van de speuler van invloed.

Hoe dan ok bint zokse spöllen winstgevend veur 't casino, umdet klaanten statistisch eziene meer geld kwietraakt as wint (beveurbield bij roulette of craps), en deurdet 't casino een part krig as klaanten tegen mekare speult (beveurbield bij poker en baccarat).

Wetgeving[bewark | bronkode bewarken]

Casino's wördt deur de aoverheid ereguleerd en econtroleerd, en ie magt der allennig in aj meerderjaorig bint. Vanwege 't risico op gokverslaving bint der vake aordig strenge wettelijke maotriegels, zoas een maximuminzet, vrogge slutingstieden of beparking van 't antal casino's in een bepaold rechtsgebied. De casino's zölf schrieft soms veur hoe of de kleraozie van bezukers mut wezen.

Der bint steden die, dankzij vrijere plaatselijke wetgeving, bekendstaot um de casino's. Lu reist der henne veur de gokkerije (goktoerisme) en/of veur de sfeer daorumhenne. Veurbielden bint Macau, Monte Carlo, Atlantic City en Las Vegas.

Nuvola apps ksig.png Dit artikel is eschreven in 't Zuudwest-Drèents.