Boage (brulfte)
Ne boage of boag bouwen is een gebroek in Tweante, Sallaand en n Achterhook biej (zovöljöarige) brulften.
Hierbiej bouwt de noabers ne boage (meestieds van hoolt) oawer n ingaank van de stroate noar de vuurdure van et hoes. Dee boage kleedt ze an met snöaihoolt van greune täkke, van dannen of aander naaldhoolt. Dit wörd greunhalen eneumd. Greun halen is duurgoans kearlswoark; de vrouwleu doot reuskes van papier volden dee as oeteandelik in de boage komt te hangen.
De kluur van de reuskes haank of van et antal joar at et stel etrouwd is. Trouwende stelle kriegnt rode en witte reuskes: rood as de kluur van leefde en wit van maagdelikheid. De 12,5-, 25- en 40-jöarige brulften kriegnt 'n kluur den at doar biej heurt, dus zilver, goold, ezw.
Tiedens en noa et boagenbouwen wordt de noabers eneugnd vuur een häpken en een dreanken, en biej et ofbrekken krek zo. Bie et ofbrekken helpt mangs et stel zelf ook met, wat angef det ze der non too verdan biej heurt.
Rechtevoort bint boagen kant en kloar te huur, en van keunststof. Vuur de traditie goat wat noabers nog aait hen greunhalen.