Bertha Benz

Uut Wikipedia, de vrye encyklopedy
Bertha Benz, ca. 1871

Bertha Benz, (geb. Bertha Ringer. Pforzheim, 3 maai 1849 – Ladenburg, 5 maai 1944) was de vraauw van Dr. Carl Benz, dij zain wordt as de voader van d'auto.

Zai kreeg vernuimdhaid as d'eerste automobilist ter wereld. Op 5 augustus 1888 muik zai n laange rit in d'eksperimentele auto van heur man. Boeten mitwaiten van Carl en in gezelschop van heur zeuns Richard en Eugen ree zai van Mannheim noar heur geboortestee Pforzheim, n òfstand van 106 km. Op t haalfschaid van de rit (in Wiesloch) mos zai brandstof bievullen. Doarveur kocht ze ligroïne in de ploatselke aptaik, dij doarmit t eerste tankstoatsion in de geschiedenis wer.

As reden veur dizze laange autorit, gaf zai n bezuik aan heur moeke in Pforzheim, mor der zat meer achter. Heur man was benoam aan d'loop mit de technische kaande van de zoak en dee nait genog om commerciële belangstellen veur zien uutvinden te wekken. Deur dizze tocht trok Bertha veul aandacht en druig zo bie aan t sukses van de Benz Patent-Motorwagen.

Tiedens de raaize mos verschaaiden moalen stopt worden om reperoatsies te doun. Doarbie was mainst de hulp van dörpssmeden neudeg, mor Bertha kon zulf ook twij mankemìnten oplözzen: 'Ain moal was de brandstoflaaiden verstopt – doarbie het mien houdenspèlle holpen. d'Aander moal was d'ontsteken in twijen broken. Dij heb k mit mien kousenbaand repereerd.' Deur uutvoereg verslag te doun van aal mankemìnten, peerdjede Bertha heur man aan om verbeterns aan zien auto deur te voeren. Zo wuir o.m. n ekstroa versnellen inbaauwd om t rieden in heuvelachteg terraain makkelker te moaken.

In herinnern aan de pioniersrit het de dailstoat Baden-Württemberg in 2008 de toeristische Bertha Benz Memorial Route in t leven roupen.