Balneologie

WIKIPEDIA kan der nit vöär instån dat de inhold van artikels kloppet.
As jy wat mankeret, kün jy et beste eaven by een dokter angån.

Balneologie (van Latien balneum, bad), ok wal balneotherapie, is een vörm van therapie deur middel van baden, vandage de dag vake in praktijk ebracht in kuuroorden. Der is aoverlap mit hydrotherapie, mar de beiden bint niet krek 't zölfde.

Der kan hiet of kold water gebruukt wörden, der kan massage plaatsevienden mit bewegend water, en der kan spraoke wezen van ontspanning of juust van stimulering. 't Veur de therapie gebruukte mineraalwater in kuuroorden is vake rieke an mineralen zoas silica, zwevel, seleen en radium. Ok kump der bij de behandeling wal ies klei (fangotherapie) of modder kieken.

Balneologie wördt inezet veur een beste bulte ziektes en mankering, waoronder artritis, hoedsandoenings en fibromyalgie. Een literetuurstudie uut 2009 kwaamp töt de gevolgtrekking det der niet genog wissigheid is aover de warkzemheid van balneologie.^[1]

Soortementen behandeling

Vörmen van balneologische behandeling bint onder meer:

Bewegingsbad: water wördt inezet um de spieren te starken en veur de deurbloeding.
Dennenaoldenbad: bij 't water wördt aromatische eulies uut dennenaolden edaone, onder meer tegen slaopeloosheid.
Inaosemingsbad: water van 37 graoden wördt anevuld mit etherische eulies, veur de lochtwegen.
Joodbad: baden in jodideholdend water, waorbij de hoed de jodide opnemp.
Kleibad: klei van tussen de 28 en 38 graoden wördt van de voeten töt de haals anebracht tegen hoedsperblemen.
Koolzoerbad: baden in koolstofdioxideholdend water veur de deurbloeding.
Modderbad: veur deurbloeding van hoed en spieren en tegen hoedsandoenings as psoriasis, eczeem en acne.
Spanningsbad: een elektrische stroom wördt deur 't water evoerd, wat mut hölpen tegen spierperblemen en rimmetiek.
Zoerstofbad: baden in water daoras zoerstof bij edaone wördt.
Zwevelbad: baden in diwaterstofsulfideholend water, tegen psoriasis en eczeem.

Verwiezings

↑ Falagas, M.E. c.s. (2009), 'The therapeutic effect of balneotherapy: Evaluation of the evidence from randomized controlled trials', International Journal of Clinical Practice 63 (7): 1068–84.

Dit artikel is eschreven in 't Zuudwest-Drèents.

[1] Falagas, M.E. c.s. (2009), 'The therapeutic effect of balneotherapy: Evaluation of the evidence from randomized controlled trials', International Journal of Clinical Practice 63 (7): 1068–84.

[1]