Akhenaten

Uut Wikipedia, de vrye encyklopedy
Beeld van Akhenaten, vonden in Amarna

Akhenaten (ook: Achnaton of Echnaton) was n Egyptische farao oet de 18e dynastie. Hai was de ainege monotheistische farao van t olle Egypte. Hai regeerde van 1352 tot 1338 veur Kristus. Hai wuir geboren onder de noam Amenhotep IV, môr veraanderde zien noam tiedens de Aton-revolutsie. Zien heufdvraauw was Nefertiti, woarmit hai 5 dochters kreeg. Zien bievraauw was Kiya, woarmit hai n zeun kreeg: Toetankhamon.

Om en bie zien 10e regeernsjoar schof hai aal Egyptische goden oaf en vervong heur deur ain zunnegod: Aton, de zunnedisk. Akhenaten luifde dat zien voader, Amenhotep III noa zien dood in dizze zunnegod veraanderde. Doarom aanbad Akhenaten dizze god, as of t zien aaigense voa was.

De keunenklekke familie dij de Aton aanbid

Hai luit ook n nije heufdstad baauwen, Akhetaton, dat nou bekend staait as Amarna. Dizze stad was dou de grootste stad ter wereld en was hailmoal baauwd ter eer van de Aton. Om en bie zien 14e regeernsjoar nam Akhenaten aine Smenkare aan as mitregent. Veul waitenschoppers mainen dat dizze Smenkare dezölfde persoon is as Nefertiti. Dizze Smenkare regeerde Zuudegypte vanoet Thebe, in tieds dat Ahkenaten Noordegypte regeerde vanoet Amarna. Dit het nait laank duurt, den noa 2 joar kwam Akhenaten oet de tied.

Dou Akhenaten oet de tied kwam en (middelekerwies) Nefertiti de troon van hom over nam, verluiten de mìnsken Akhetaton en wuir Thebes weer de heufdstad. Nefertiti stèlde de olle goden weer in, moar behuil de Aton as eene van heur. Dou ook zai dood gong, was elkenain dij veur de Aton was vot. Toetankhamon wuir farao. Aal dingen dij heugden aan de tied van de Aton wuiren hailmoal of dails vernietegd.

Boetende heenwieze[bewark | bronkode bewarken]

Wikimedia Commons Commons: Akhenaten - plaatjes, filmkes en/of gelüüdsbestanden.