HIV/AIDS
|
WIKIPEDIA kan der nit vöär instån dat de inhold van artikels kloppet. As jy wat mankeret, kün jy et beste eaven by een dokter angån. |
Human immunodeficiency virus infection un acquired immunodeficiency syndrome (HIV/AIDS, in neadersassisk vake simpelweg Aids enöömd) is ne rygel andoningen dee untståt döär besmetting med et menskelike afwäärverslappingsvirus (HIV), en retrovirus. Nå de eyrste besmetting market en menske noch niks. Wat lüde kryget wat grypverskynselen. Döärgåns kümt der dan ne längere inkubatytyd sunder klachten. As de infekty groit, bemoit et sik voordan meyr med et afwäärstelsel. Dat verhöygt de kans up gewoane infektys as tuberkulose of meyr ungewoane infektys un tumoren dee by lüde med en normaal afwäärstelsel neet vöärkummet. Rap gewicht kwytraken is ouk en verskynsel in dit stadium. Disse latere klachten wordet et acquired immunodeficiency syndrome (AIDS) enöömd. Ne bettere platte name solde weasen upvolgend afwäärfalen.
Spreid
[bewark | bronkode bewarken]HIV wördt höyvdsakelik verspreid by unbeskarmden seks (souwal van achteren as van vöärden), besmette spoitnålden un bloodtransfusys. Et kan ouk van moder up kind oaverdragen worden tydens de swangerskop, de bevalling of by et anleggen an de börste. Wat lyfssappen as spye, sweyt un trånen draeget et neet oaver. By seks med den mund is der weinig kans up besmetting. Besmettingen sint to vöärkummen döär veiligen seks, nåldinwesselingsprogramma's, behandeling van besmetten, un vöärsorgsmåtregelen vöär un nå bloutstelling. babyseekde kan vöärkummen wörden döär beide de moder un et kind antiretrovirale medicynen to doon.
Uutwarking
[bewark | bronkode bewarken]Vöärin de jåren '80 van et 20. jårhunderd wör HIV/AIDS up wearldskåle erkend. Et set heyle samenleavingen to üntersteböäventen, beide as seekde un as readen üm besmette lüde as minderwaerdig to bestempelen. Lüde wårvan as bekend is dat se Aids hebbet, kryget en kladden an et gat un wordet döär de umgeaving mangs an öär lot oaverelåten. Oaver HIV/AIDS beståt heyl wat misverstanden, sou as et idee dat et kan oaverspringen by normaal neet-seksueel anraken. Ouk vöär et inkummen van lüde un de ekonomy van landen up gröttere skåle maket aids vöäle to doon. De seekde sorget vöär vöäle skandalen, med name binnen gelöyven. De Roumsk-Katolike Karke wil byvöärbeald noch altyd neet anråden dat lüde nen kondoom ümme müt as se med unbekenden et bedde inkrupet.
Et steyt al jåren houge up politike un mediske agenda's un vöär undersöök trekket heyl wat lüde de knippe.
Geskedenisse
[bewark | bronkode bewarken]HIV müt oaveredraegen wean van aepe up lüde in midwestelik Afrika vöärin de 20. eywe. AIDS wör pas eyrst erkend döär amerikaanske Centers for Disease, Control and Prevention (CDC) in 1981. Den oorsaak —HIV-besmetting— wör neet vöäle later untdekked. Tüsken de eyrste untdekking un 2021 sint der når skatting ten minsten 40 miljoon lüde oaver de heyle wearld al an estörven. In 2021 störven der 650.000 an un warren der ungeväär 38 miljoon bekende gevallen up de wearld. Ungeväär 20,6 miljoon dårvan woanet in oustelik un südelik Afrika. HIV/AIDS wördt eseen as pandemy; nen seekde dee sik oaver ne groute streake an et spreiden is.
Behandeling
[bewark | bronkode bewarken]De National Institues of Health (NIH) van de VS un de Gates foundation hebbet ungeväär 180 miljoon Euro uutetrökken vöär ne behandeling van AIDS. Ne kure of ente besteyt noch neet. Toch künnet lüde med antiretrovirale behandelingen inmiddels souwat net sou lange un good leaven as neet-besmetten. Mär dan müt der wal medeyne nå vaststelling van de seekde med begünnen worden. De döärsneyde oaverleavingstyd nå besmetting is 11 jår.