Yellowman

Yellowman in 2007

Winston Foster OD, (1956 of 15. january 1959), better bekend under synen artistenname Yellowman of King Yellowman (ne verwysing nå syn albinisme) is nen jamaikaansken reggae- un dancehall-deejay. Synen döärbraak was de jåren '80 van de 20. eywe, do as he med en stel upvallende singels up et toneel küm.

Al sou'n beaten vanaf et begin van syne loupbane hevt Yellowman to kampen med kanker. Hee must verskeidene målen under et mes, un by eyne ingrypende operaty wör en flink deyl van syn kennebakkenbot vordehaald, wårdöär syn gesichte der altyd verwrüngen uutsüt.

Vandage den dag geldet Yellowman as eyne van de grundleggers van de dancehall. Der is van em esegd at hee 'håste eygenhandig et ruwe, unbenüllige un skaamtelous direkte gelüüd van de hüdige dancehall uutevünden hevt'. As eyne van de eyrste generatys dancehalldeejays wüst hee en internationaal publik an to sprekken.

Leaven & loupbane

Foster wör döär syne olden achterelåten. Sou küm hee torechte in et Maxfield Kindertehuus un et katolike weyshuus Alpha Boys School in Kingston. Dee skole stünd bekend üm de vöäle artisten wat der up hadden esetten. Ümdat he albino was wol gin menske wat med em to maken hebben. Sou güng dat in dee tyd. Achterin de jåren '70 kreag syn eyrste bekendheid do as he as tweydes endigden achter Nadine Sutherland by et Tastee Talent Contest, nen wedstryd wat de et jår der up wal wüst to winnen. Dårmed küm syne professionäle loupbane good van de grund.

Net as andere jamaikaanske deejays dea hee vöäle uptreaden med soundsystems in de butenlucht, hee vöäral med Aces International. Med musikproducent Henry 'Junjo' Lawes nöäm he en paar platen up dee as good verkochten. In 1981 was Yellowman den eyrsten dancehallmaker wat en platenkontrakt by nen grouten amerikaansken verkouper (Columbia Records) wüst to krygen.

Syn eyrste studioalbum was Mister Yellowman (1982). Syn hit Zungguzungguguzungguzeng uut 1983 geldt noch altyd as eyne van de grötste dancehall-klassikers. Med de faam kümmen vanselv ouk de neyseggers, vöäral üm syne uutvorige beskryvingen van wat hee in den slåpkamer torechte wüst to krygen, de sounöömde slackness-teksten. Dårup sea hee: "Ik begrype neet wat se der verdörven an vindet. Ik küere oaver seks, mär ydereyne düt et, achter dichte döären. Ik hebbe et gewoan oaver dagelikse dinge."

By Aces tröäd he vake up med Vernon 'Fathead' Rainford, wår hee ouk wat platen med upnöäm. Al med al warren de tachtiger jåren syne meyst produktive jåren. Hee gavven rund de twentig albums uut under verskillende labels, sou as Mister Yellowman, Duppy or Gunman, Bad Boy Skanking, Zungguzungguguzungguzeng, un anderen.

Yellowman stünd in et blad Jamaican Dancehall Volcano Hi-power 1983, nöäst andere groute dancehallnamen as Massive Dread, Josey Wales, Burro Banton un Eek-A-Mouse. Syne uutgave King Yellowman in 1984 floppeden, ümdat der ouk rhythm & blues un disco-elementen döärhen satten un dår satten de leevhebbers neet up to wachten. CBS dea Yellowman der achterhen. Hee kun dårdöär rap weaderümme når syne vaste riddims un 'verdörvenheid', un syne loupbane was rap weader in de beyne.

In 1987 stünd hee verskeidene wekken up nummer 1 in de jamaikaanske hitlysten med ne versy van de bekende blueshit 'Blueberry Hill' van Fats Domino. Den amerikaan had en paar jår eyrder al up et eiland upetreaden, un Yellowman eyne van syne platen edån.

Vanaf de jåren '90 begün Yellowman meyr sociaal bewöägen spül uut to brengen, wårmed hee nöäst bekendere artisten as Buju Banton up et internationale toneel küm to stån. An et begin van syne loupbane gavven hee sou'n 40 singels uut un makeden sou'n vyv albums et jår.

In 1994 küm hee med et album Prayer, wårmed as hee syne 'smearlapperige' kante de rügge to draiden. Et was syne wyse üm god to danken vöär syn sukces un et oaverleaven van kanker.

Yellowman is twey mål oaver nomineerd eweasd vöär nen Grammy Award vöär Beste Reggae Album. In 1985 vöär King Yellowman un in 1998 vöär Freedom of Speech. Hee was den eyrsten dancehall-artist wat dår ooit vöär up de lyste stünd.

In 2018 wör hee döär de jamaikaanske regeyring eridderd in de Order of Distinction (OD).

Persöönlik

Yellowman is al seyd et begin van syne loupbane trouwd med syne vrouwe Rosie. See hebbet verskeidene kinder. Yellowman is leevhebber van basketball un hevt verskeidene målen by de NBA medekeaken. Eyne van syne söäns hevt he nöömd når den bekenden spöller Kareem Abdul-Jabbar. Syn dochter Kareema is ouk de musik inegån un düt reagelmåtig med em uptreaden.

Yellowman müt niks hebben van geweld. In 2005 sea hee teagen de Montreal Mirror: "Rechtevoord is der weinig pleseer of underwys meyr in. As y kyket når de hiphop un dancehall-artisten van nu; dee doot niks as singen oaver drugs, kleyder, auto's, hüse - un as se dat neet kryget, hauwet se der up. Ik kenne geweld, wat et inhöldt un wat et kan doon. Ik sin blyde at de rootsmusik weaderkümt." De slackness-style steyt ouk bekend üm homofobe tekste. Dårvan sea hee in datselvde artikel: "Müt y es lüsteren... Ik make gin musik teagen homo's, un gin uproop töt geweld teagen homo's. As y der eyne of en ding neet magget, hold y der de lippe oaver. Dan gå y et der neet up en podium teagen an van 'doot se doud of stekt se in den brand'. Alleman hevt recht van leaven."

Kanker

In 1982 bleak Yellowman hüüdkanker to hebben. Nå verskeidene operaties kunde hee voordan med syne loupbane. De kanker bleav dårnå under kontrole. Tüsken 1984 un 1986 wör düdelik at et sik in syne kiwwe verspreided had. Üm den kwådårdigen tumor vord to halen, must en grout deyl van synen kennebak vord. Vandår at Yellowman vandage den dag altyd med en verwrüngen gesichte rundlöpt. Hee must nen set revalideren un kun weader uptreaden vanaaf 1987.