Wasbod (schoonmaek)
Een wasbod wodde vrogger bruukt veur et mit de haand schoonschrobben van de was. Et bod mit een meerstal hoolten omliesting is omdebi'j 30 bi'j 40 cm en bestaot uut ribbels van galvaniseerd staele waor et wasgoed oplegd wodde, waornao et mit een harde wasborstel en grune ziepe schoonbuund wodde. In laetere jaoren wodde in plaetse van grune ziepe "Sunlight"-ziepe bruukt. Véúr de 19e ieuw bestonnen de ribbels uut hoolt. In de 20e ieuw wodde meer en meer metaol bruukt. An et aende van de 19e ieuw en in de eerste helte van de twintigste ieuw bin de meeste meensken overstapt op galvaniseerd staele. Tegenwoordig wodden nog wasbodden van koper maekt en pattie muzikaanten vienen et geluud van de duurdere koperen wasbodden beter.
Et wasbod wodde verdrongen deur de wasmesiene. In pattie lanen zoas India en Afrika wodt et wasbod liekewel nog vaeke bruukt.
Bi'j de meziek wodt et wasbod as ritmisch insterment bruukt. Et bord hangt veur de bost van een persoon, die op et bod slat of wrift mit stokkies, Jazz-bossels of de haand. Bi'j et bespeulen mit de haand wodden vaeke vingerhoeties over de vingertoppen daon. As meziekinsterment wodt et wasbod bruukt bi'j bi'jveurbeeld de volgende meziekstielen: skiffle, dixieland, cajun, Rock-'n-roll en rockabilly.
Nedersaksisch
[bewark | bronkode bewarken]- Grunnegs: waskebred
- Veluws: wasbord
- Stellingwarfs: wasbod
- Sallaands: wasböd