Goaitsen van der Vliet

Goaitsen van der Vliet (Surhuzum, 1951) is een uutgever en tekstverzörger in Twente van Friese ofkumst, die gaanks is mit 't Twèents as skrief- en cultuurtaal.

Kiek op 't Twèents

Van der Vliet, die sund zien studententied in Eanske woont, hef 't gebruuk van de streektaal op slim veule manieren verni'jd en is daorbi'j niet bange um de knuppel in 't hoenderhokke te gooien. Hi'j stiet bekend as iene die zich mangs utert oaver de gewoonte um de streektaal te reserveren veur (in de weurde van Frank Löwik) 'folklore en kritiekloze ophemmeling van anneke-bestemoorstied', en um dizze taal koste wat kost marginaal te holden (beveurbield aj eneugd wördt veur de viering van een dialectmaond mit een folder die van kop töt starte in 't 'Hooghaarlemmerdieks' eskreben is).

Bi'j zien benaodering van 't Twèents lat Van der Vliet hum inspireren deur hoe as d'r mit 't Fries as cultuurtaal wördt ummesprungen. Hi'j had in 1977 in Eanske al de oprichter ewest van de eerste Friestalige rockband, Rockploech Spul.

Uutgeveri'je en skrieveri'je

Mit zien ienmansbedrief De Oare útjouwerij (De Aandere uutgeveri'je) gef Van der Vliet literatuur, poëzie, bieldende kuunst, streektaalwark, geleengheidswark en (sund 1994) 't 'Blad in t plat' De Nieje Tied uut. De uutgeveri'je publiceert in 't Twèents, Fries en Nederlaans en huust in Eanske. Een bekende uutgave, die an 't begun stund van Van der Vliet zien interesse veur 't Twèents, is Heftan tattat! (gedichn in t stadsplat) van Willem Wilmink (1992).

Onder de titel De Verdichting publiceerden e Twèentse vertalings van gedichten uut verskeiden talen in 't Twèentse weekblad De Roskam. Mit Frank Löwik hef hi'j de Twèentse vertaling emeuken veur 't stripboek Asterix den Galliër (1997), det hi'j ok hef uutegeben. Ok was hi'j taalcoach (eerste jaor) en hef hi'j dialogen vertaald (tweide jaor) veur de Twèentstalige zieperiege Van Jonge Leu en Oale Groond.

Standaard Schriefwieze

Van der Vliet hef de Standaard Schriefwieze ontwörpen veur Twèentse en anverwaante streektalen. Dizze skriefwieze is de miest gangbare veur 't Twèents naost de skriefwieze van de Kreenk vuur de Twentse Sproak en is ebaseerd op de eerste versie daorvan. De Standaard Schriefwieze wik op een paar punten of van de leste versies van de Kreenk-skriefwieze, en d'r bint riegels bi'j edaon die volngs Van der Vliet de streektaalvariaanten in heur skriftelijke weergaove meer op menare antrekt en de leesberheid verhoogt. De Standaard Schriefwieze is fonologischer as de mieste aandere schriefwiezen veur 't Nedersaksisch as 't giet um de uutgaank -n (maakn, beginn, teagn) in stee van -en (maken, beginnen, teagen).

Dialexicon Twents, films, Twentse Taalbank

Van der Vliet is de samensteller van 't Dialexicon Twents, een digitaal woordenboek mit (in oktober 2010) hoast 50.000 trefwoorden en 25.000 uutdrokkings, Twèents-Nederlaans en Nederlaans-Twèents. 't Giet uut van de Standaard Schriefwieze.

Mit regisseur Patrick Drijver meuk hi'j veur 't museum TwentseWelle in 2007 de körte films Hoe kleiner hoe meer (Nanotechnologie in Twente), Oude grond, nieuwe plannen (Veranderingen op het Twentse platteland) en Rijles in een andere wereld (De scootmobielsimulator).

Goaitsen van der Vliet is bedeanker, en (seend 1 september 2010) projektleider en konservator van de Twentse Taalbank, n meerjoarig projekt van de Oudheidkamer Twente met subsidie van de Proveencie Oaveriessel en de Mondriaan Stichting veur et in kaart brengn, biej mekaar gaddern, beschrievn en toogaankelik maakn van alns wat der in lange joarn in en oaver t Tweanter plat in de weerld komn is.

Uutgaonde verwiezing

Goaitsen van der Vliet zien webstee, mit verwiezings naor zien wark op streektaalgebied

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.