Frank Löwik
Franciscus Gerhardus Hieronymus (Frank) Löwik (Almelo, 30 september 1956 - Leeuwarden, 23 februari 2009) was een Twèentse historicus en skriever die as hum onder aandere gaanks höld mit de bestudering van 't Twèentse regionaolisme.
Skrieveri'je oaver 't Twèentse regionaolisme[bewark | bronkode bewarken]
Löwik studeerden geskiedenis en Duuts an de Rieksuniversiteit Grönning (RUG) en was docent geskiedenis en maotskoppi'jlere an een skoelengemienskop in Liwwadden. In 2003 promoveerden hi'j an 't Nedersaksisch Instituut van de Faculteit der Letteren van de RUG mit 't proefskrift De Twentse Beweging : strijd voor modersproake en eigenheid. In dit wark, as handelsuutgave uutebrocht deur 't Van Deinse Instituut, beskrif e 't Twèentse regionaolisme vanof de Romantiek: de gruiende andacht veur de eigen bouwkuunst, gebruken, spraoke, media enzowieder. Hi'j beskrif ok de verholding van dit regionaolisme töt 'de groot-Nedersaksische gedachte' van de jaoren vieftig, en pleit veur een hogere erkennige van 't Nedersaksisch middels diel III van 't Europees Haandvest veur regionaole talen of talen van minderheden.
Löwik zag een gruiend antal 'complementaire' 'regionaolistische initiatieven'. Hi'j pleitten ok veur Twèents taalbeleid, umdet e 't gebruuk en de kwaliteit van de streektaal 'dudelijk' umdale zag gaon.
De Nieje Tied en literaire skrieveri'je[bewark | bronkode bewarken]
In 1993 brocht Löwik de bundel Op n biester (Niejmoodse schetsn in t Almeloos) uut bi'j De Oare útjouwerij in Eanske.
Mit de eigenaor van dizze uutgeveri'je, Goaitsen van der Vliet, perbeerden Löwik 't Twèents an te fietern as skrief- en cultuurtaal. De beiden richtten een jaor later De Nieje Tied op, een literair-cultureel tiedskrift in 't Twèents en naobernde Nedersaksische taalvariaanten. Dit tiedskrift wil ni'jmòeds wèden, in oaverienstemming mit Löwik zien kiek det 't heersende conservatisme 'in smaakbeleving, vorm en thematiek' in de Twèentse skrieveri'je hef eleid töt 't idee det 't Twèents wat van vrogger is en niet sexy wèden kan.
In 1997 kwammen Löwik en Van der Vliet mit heur Asterix-vertaling Ne gesjichte van Asterix den Galliër (Eanske, De Oare útjouwerij). In 2007 kwaamp bi'j dizze uutgeveri'je een bundel vertellegies en columns van Löwik uut onder de titel Flantuutn (verhaaln en kaanttekstn). Dizze vertellegies en columns harren eerder in De Nieje Tied en De Roskam estaone.
Bronnen[bewark | bronkode bewarken]
- Löwik zien proefskrift De Twentse Beweging : strijd voor modersproake en eigenheid (Rieksuniversiteit Grönning, 2003)
- Twentse taal en cultuur in modern jasje: Geschiedschrijving over het Twentse regionalisme (Rieksuniversiteit Grönning)
- 't Friesch Dagblad oaver Löwik zien proefskrift en de streektaal
- De Oare útjouwerij oaver Löwik zien vertellegiesbundel Op n biester
- De Oare útjouwerij oaver de Asterix-vertaling Ne gesjichte van Asterix den Galliër
- De Oare útjouwerij oaver Löwik zien vertellegiesbundel Flantuutn
![]() |
Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek. |