YouTube
YouTube is en online platform üm video's uut to wesselen. Et höyvdkantoor sit in San Bruno in et amerikaanske Kalifornie. Et is der wearldwyd vöär te krygen. De uprichters sint Steve Chen, Chad Hurley un Jawed Karim. Inmiddels is et van Google. Nå Google Söyken is et de best besöchte websteade van de wearld. Meyr as 2,5 miljard lüde besöket et platform måndeliks, un dee kyket by mekander meyr as eyn miljard uur an video's up nen dag. Vanaf mei 2019 wör der meyr as 500 uur an video's de minute by up esat.
Oktober 2006 kochten Google YouTube vöär € 1,54 miljard. Google bouwden et sakelike model van YouTube wyder uut. Se kreagen neet enkel meyr winst uut reklames, mär ouk uut betaalde video's, as heyle films un speciaal vöär YouTube emaked vermaak. Lüde wat gin belang by reklame hebbet künnet ouk betalen vöär YouTube Premium, dan kryget se klåre filmkes. YouTube hevt ouk filmmakers dee meddoot in et programma van Google AdSense, wår beide partyen beater an wordet. In 2021 verdeenden YouTube € 26,8 miljard an reklameinkomsten, wat € 8,3 miljard meyr was as et jår dervöär. In 2022 was de winst € 27,2 billion.
Vanaf dat Google et oavernöäm hebbet se YouTube wyder uutebouwd dat et ouk warket up mobylkes, netwarktelevisiy un in andere platförme in to vogen is. Up YouTube steyt allens van musikvideo's, vermaak, nys, korte un lange films töt leedkes, dokumentäres, filmvöärpröve, liveströyms, vlogs un meyr. De meyste video's kummet van gewoane lüde, mär ouk van instellingen dee as samenwarket met YouTube. Ouk öldere mediabedryve as Disney, Paramount, NBCUniversal un Warner Bros Discovery hebbet rechtevoord en YouTube-kanaal üm en grötter publik to bereiken.
Den socialen invlood van YouTube up de wearld is ungekend. Et hevt de popkultuur veranderd, drivt internettrends un verskeidene lüde sint der wearldwyd bekend med ewörden (un multimiljonäär). De andere kante is dat up YouTube makkelik valske informaty verspreid kan worden un dat et autöörsrecht up heyl wat warken neet garandeerd worden kan. Ouk de eygenrüümde van gebrukers is neet garandeerd un gebrukers künnet in et echte leaven censureerd worden. Kinder künnet ouk allens medkyken. Un as der wat an de gebruuksvöärwaerden verandert, is et mär afwachten of ydereyne dår wat van medkrigt un et der med eyns is.