Wikipedia:Parsberichen/Tweejaorig bestaon/Riesns
Twee joar Neersassiese Wikipedie!
- Wat beent Tweantse skeeldnaamns?
- Wukke Neersassiese skrievers beent dr zo al?
- Wo zut t Putters, t Riesns of t Westerwoolds dr oet?
- Wovölle Neersassiese naamns beent dr vuur de geetelink en n leppeldeef?
De dialektn van Noordoost-Neerlaand, met mekoar t Neersassisch eneumd, beent de leste joarn in populariteit egröaid. Ze maakt dr popmeziek in, skriewt dr in, maakt regiosoaps en zo wieter. Disn niejn andach, den ok vuur aandere strektaaln binn en boetn Neerlaand opgeet, neumt ze de Dialectrenaissance.
- Dreedoezend stuks in t Grönns, t Tweants, t Veluws…
Op t internet is dr nog neet zo machtig völle te veendn oaver ’t Neersassies, mear dr beent toch wal wat skiere websteas. De skierste doarvan is zoonder twiefel de Neersassiese Wikipedie, ne vrieje encyclopedie dee at iedereene kan bewoarkn in elk Neersassisch dialekt van Neerlaand. Vuur twee joar – in meart 2006 – bi-w begunn, en dr beent non al zowat dreedoeznd artikels! Dreedoeznd stuks in t Achterhooks, Dreants, Grönns, Sallaands, Stellingwarfs, Tweants, Oost-Veluws, West-Veluws en Urkers.
Wat is non feailik de Wikipedie?
- De Wikipedie is n woarksken vuur en duur iederene
De Wikipedie, in ’t Hollaands en Engels ‘Wikipedia’ eneumd, is n onmeundig grote encyclopedie op t internet, begunn in 2001. De Engelse Wikipedia hef mear as twee miljoen artikels en de Hollaanse hef dr um en noabiej n half miljoen. Dèt is meugelik umdet iedereene dr vriej an met mag skriewn. Deankt oew s in: ie skriewt n artikelsken. As dan n aander t verbèttern wil, mag-e dèt op de stean doon. A-j oew neet in ne wieziging köant veendn, goa-j in oawerleg. Gineene is ‘eigenaar’ van n artikel. De Wikipedie is een woarksken vuur en duur iederene.
- Wikipedie wördt allene mear better.
Wo woarkt dèt, met mekoar n encylopedie skriewn?
At iederene zomear kan metskriewn, stoat dr dan gin foutn of zwak eskreewn artikels op de Wikipedie? Jaowal, vanzelf. En dr wördt ok vandelisme pleegd duur n hoop leu, dee willemoods onzin skriewt. Mear oawer t algemeen zorge viej dr vuur dèt dr zo völle meugelik foutn verbètterd wördt en zo good meugelike artikels op ebouwd wördt. En vandalisme wördt altied heel rap vort ehaald. Duur de tied hen he-w eleard dèt de artikels op de verskeaidene taalversies van Wikipedia dr al bètter op wördt. Dr wördt skoarp elett op de artikels, en wat n eenn neet weet, vult n aander an.1
Neersassiese en algemene oonderwoarpn
t Meuie is dè-j op de Neersassiese Wikipedie onmeundig völle informasie oawer Neersassiese oonderwoarpn veendt dee-j neet zo gauw oarns aanders veendt. Wat beent non kenmoarknde vuur- en achternaamns in oons deel van t laand? Woer zegnt ze ‘Moi’ en woer vroagnt ze o-j ‘good te passe’ bint? Wat beent de Iesselakkademie en t Huus van de Taol? Woer ligt Wenters, De Voart, De Wiek en Knoal? Wee skreef t eerste Dreantstalige gedicht? Woer viert ze Stöppelhaene? Wo gung dèt vèrsken oawer t peerd van ome Loeks? En goat zo mear duur.
- In t plat kö-j oawer alns skriewn.
D’r beent ok nen heeln hoop artikels oawer neet-Neersassiese oonderwoarpn, en dèt is ook belangriek: da-w zeen loatt dè-j ook in t plat oawer alns skriewn köant.
Wat kön iej non vuur de Neersassiese Wikipedie doon?
Viej skriewt dit um eawn stille te stoan bie twee joar Neersassiese Wikipedie, mear ook um dit skiere woark nog wieter an te priezn. Want dr beent nog aalt mear heel weainig skriewers, en n antal strekn beent nog neet good verteegnwoordigd duur metwoarkers dee doar wegkomt. Doarumme mu-j es kiekn of iej neet ok es n stukn weelt skriewn. Oawer oewn dörp of stad, of n oonderwoarp woer a-j machtig völle van weett. Mean iej dè-j gin Neersassies skriewn köant? Kiekt dan mear es hier:
Mear dr beent nog mear meniern um met te doon. Bievuurbeeld duur foto’s en aandere soortn ofbeeldings vuur bie de artikels te maakn en dee vriej te geewn vuur de Wikipedie. Iej köant zelfs oewn eegn of bestoande artikels insprèkn in oewn dialekt!
Gewoon metdoon!
Goodgoan!
- n Vuurbeeld gef an dèt Wikipedia woarkt: in 2005 steun dr in t vuuranstoande wetenskoppelike blad Nature n oonderzeuk dèt artikels oawer wetenskoppelike onderwoarpn in de Engelstalige Wikipedia vergeleek met de Encyclopædia Britannica. In beaidn veundn ze acht grote foutn: veere in Wikipedia en veere in Britannica, en ne riege kleaine onjuustheedn: 162 in Wikipedia en 123 in Britannica. Kiekt zelf mear es noar oonze Neersassiese Wikipedie wo of t oe lik!