Tweyden Kamer

De groute sale van den Tweyden Kamer

Den Tweyden Kamer van de Ståten-Generaal, meysttyds afekört töt Tweyden Kamer, is tohoupe med den Eyrsten Kamer de Neaderlandske Ståten-Generaal, dee gåt oaver et dagelikse bestüür van Nederland. Et neaderlandske volk geyt alle veer jår hen stemmen üm to bepålen wee as der in den Tweyden Kamer mag sitten. Den eyrsten sitting was up den 21. september van 1815 un seyd 1956 hevt den Tweyden Kamer 150 seatels.

Den Tweyden Kamer helpt medbepålen wat vöär wetten der in Neaderland geldet. Leyden künnet ouk selv wetten andraegen üm to bekyken. Nen minister kan den Tweyden Kamer neet dwingen üm der når te kyken. As tweyden taak kikt den Tweyden Kamer nå wat de regeyring by den ende hevt. De ministers van disse regeyring künnet vöär saken up et matje ropen worden. In den Tweyden Kamer wordet regeyringsverbunden emaked un vallet mangs ouk weader uut mekander. Nen minister of et heyle ministerkabinet besteyt by de graty van ne meyrderheid in den Tweyden Kamer. As dee meynet dat nen minister wat verknoiet künnet se em der uut warken. Dat was neet altyd sou. In de sestiger jåren van den neagenteenden eywe is dat sou untstån.

Taken

Den Tweyden Kamer hevt dree taken:

• wetten bekyken (tohoupe med de regeyring un Eyrsten Kamer),
• de regeyring up de vingers kyken,
• et volk vöärspreaken

Wetten bekyken

Den Tweyden Kamer is deyl van den wetgeavenden macht van Neaderland. Alle vöärstellen vöär wetten müttet eyrst döär den Eyrsten un Tweyden Kamer bekeaken worden. As nen meyrerheid vöär stemt, kümt den wet der döär. Dat geldt neet vöär ne verandering an den Grundwet. Dår müt in beide kamers twey mål oaver stemd worden, med ne verkesingsrunde der tüsken. Sou müttet de kamers med verskillende lüde up de stöle vöär stemmen. By de tweyde stemming müttet der minstens twey darde vöär weasen, anders geyt et neet döär.

Vöäle wetsvöärslage kummet van de ministers, uut name van de regeyring. Vöäle plannen vöär wetsvöärslage wordet al vöär de kabinetswarktyd vaste legd in en regeyroavereynkumst, al is dat nargens officiääl vastelegd. Samenwarkende partyen doot up vöärhand al underhandelen wat vöär wetten as se achter ståt: se doot water by den wyn un wesselt underling vöärslage uut. Sou weat nen minister vöäraf vake al of de wetsvöärslage den Tweyden Kamer kan akkorderen of neet.

Den Tweyden Kamer hevt ouk et recht üm selv vöärslage to doon. Vake geböärt dat neet, meysttyds mär en paar et jår. In 2020 warren et der söäventene, in 2021 un 2022 veertene. Den advysafdeyling van den Råd van Ståte bekikt et eyrst, dårnå geyt et up skrivt de kamer rund. As et dan noch oaverende blivt, doot se et in den kamer beküren. Et Tweyde Kamerlid of de -leyden van wee as et vöärslag is, sittet up dat ougenblik achter de regeyring in Vak K, üm öär vöärslag to verdeadigen. As et der alleman med eyns is, geyt et når den Eyrsten Kamer hen. Dår müttet sik dee wat et vöäresteld hebbet ouk weader melden. Der geyt vake noch wal wat tyd oaverhen vöär at der estemd wördt oaver en wetsvöärslag. In 2020 wörden van de inedeende vöärslage veer anenöämen un twey afeweysen. Dee van 2021 wörden der dree van anenöämen un twey verwörpen. De rest must up den 1. januåry 2023 noch beküerd worden.

En ander vöärnaam recht van den Tweyden Kamer is et recht van amendement. Dat wil seggen at se deylen van vöärslage magt veranderen as dat sou uutkümt. As ne meyrerheid van den Tweyden Kamer instemt med en amendement, geyt et döär. As dat nen minister neet når et sinne is, kan den dreigen med aftreaden of intrekken van et heyle wetsvöärslag.

Beheyrsen van de regeyring

Üm de regeyring in et gareel to holden, hevt den Tweyden Kamer verskillende rechten un instrumenten: et vrågenrecht, recht van begroting, recht van interpellaty un recht van enquête.

Ne vöärname bevoogdheid van den Tweyden Kamer is et recht van begroting. See magget dårmed ministerys geld tokennen un afnemmen. Ouk kan den Tweyden Kamer syn Recht van Interpellaty insetten. Dårby wordet ministers un ståtssekretårissen döär Kamerleyden up et matje ropen un müttet see antwoorden up alle vrågen wat den Tweyden Kamer öär stelt. De vrågen künnet ouk up papyr aneleyverd worden.

Mangs gebrukt den Tweyden Kamer syn recht van enquête üm meyr insicht oaver ne spöälende sake te krygen. Der wördt dan ne parlementäre enquête uuteskreaven. Nen dårvöär aneweysen kommissy van Tweyde Kamerleyden söcht et dan allemål uut. Ydereyne kan dårby uperopen worden un müt under eyde ne verklåring geaven. As se neet willet künnet se dwüngen worden. Un as se leget, künnet se vervolgd worden vöär meineyd.

Dårnöäst gevt et noch en parlementäär undersöök. Dårby geldet ginnen plicht vöär undersöchtden. Dit middel gebrukt den Kamer vake as et geyt üm meyr insicht, un neet sou seyr üm de wårheid vinden. Ouk is der noch de parlementäre undervråging. Dårby wordet lüde in kleine setting verhöyrd. Dårby wordet neet de archiven uutespitted mär getügen wal under eyde verhöyrd. Sou krigt den Kamer rap wårheid boaven tåfel.

Den Tweyden Kamer kan ouk sounöömde motys indenen. Dat doot se verskeidene dusende målen et jår. Soune moty bevat de meyning van den Tweyden Kamer, med en versöök an nen minister of et kabinet üm yts anders an to vatten of jüüst neet to doon. Ne moty gevt ginnen döärslag, nen minister hoovt der niks med to doon, behalve de moty van wantrouwen. As ne meyrerheid van den Kamer achter ne moty van wantrouwen steyt, müt denne of dee wat et angeyt vertrekken. Minder swår wegt de moty van afköäring. Dårmed wårskouwt den Kamer en bewindsmenske un sprekt afköäring uut, mär dwingt den persoon neet töt upstappen. Nen noch lechteren förm is de moty van tröärnis.

Seatels

Partij	2023	2021	2017	2012	2010	2006
PVV	37	17	20	15	24	9
PvdA	25 ª	9	9	38	30	33
GL	25 ª	8	14	4	10	7
VVD	24	34	33	41	31	22
NSC	20
D66	9	24	19	12	10	3
BBB	7	1
CDA	5	15	19	13	21	41
SP	5	9	14	15	15	25
DENK	3	3	3
PvdD	3	6	5	2	2	2
FvD	3	8	2
SGP	3	3	3	3	2	2
CU	3	5	5	5	5	6
Volt	2	3
JA21	1	3
50+		1	4	2
BIJ1		1
Totaol	150	150	150	150	150	150

ª 2023: PvdA + GL = 25