Pluto (dwargplaneet)

Uut Wikipedia, de vrye encyklopedy
Nå navigaty springen Nå söken springen
't Noordelijk halfrond van Pluto in waore kleuren, in 2015 op de kiek ezet deur de NASA

Pluto is een dwargplaneet in de Kupergördel (een dikke bulte groes van stien en ies achter Neptunus, in de op ien nao butenste contrei van 't zunnestelsel). De dwargplaneet krig zien name van de Romeinse god van de onderwereld, Pluto.

Pluto wördden in 1930 opemarkt deur de Amerikaanse steernskundige Clyde Tombaugh en stund töt 2006 te boek as de negende planeet. In det jaor klassificeerde de Internationale Astronomische Unie Pluto as een dwargplaneet: der waren ja nog wiedere objecten van vergeliekbere grootte ontdekt in de Kupergördel en in de verstreide schieve. In de catalogus van planeetachtigen vien ie Pluto onder nummer 134340.

De slim excentrische (van een cirkel ofwiekende) bane van Pluto lig veur een groot diel buten die van Neptunus. Pluto döt der 248 jaor aover um um de zunne henne te dreien, en lig daor gemiddeld haoste veertigmaol zo wied vanof as de Eerde.

Pluto hef vief maonen. De grootste daorvan, Charon, hef zoveule massa det Pluto en Charon rond een mandielig zwaortepunte dreit det buten 't oppervlak van Pluto zölf lig. Daorumme bint der goenend die de beide hemellichamen ziet as een dubbel-dwargplaneet.

Nuvola apps ksig.png Dit artikel is eschreven in 't Zuudwest-Drèents.