Hendrik Willem Heuvel
Hendrik Willem Heuvel (Laorne, 1864 - 1926), ok bekeand as Meester Heuvel, was een Achterhookse schriever.
Heuvel worden in 1864 geboren op boerderieje Blauwhand in Laorne. Hee hef eerst as knech ewarkt op de boerderieje van zien va, later was hee onderwiezer in Laorne bie meester Postel. In 1890 worden hee hoofd van de schole in Gelster. Vanaf 1901 was hee schoolhoofd in Borklo, eerst van de Hofschole, later van de boerenschole (landbouwschole), de latere H. W. Heuvelschool. Vanaf 1892 tot an zienen dood in 1926 gaf hee ok landbouwcursussen. Wieter was hee heel betrokken bie het karkelek wark en de drankbestrieding. Hee was slim belaezen en had belangstelling op allerlei gebied.
In zien laeven hef meister Heuvel heel wat eschrevvene. Ovver de geschiedenis van den Achterhook, zo as in Oud Gelselaar en Geschiedenis van het land van Berkel en Schipbeek. Ok schref hee beukskes veur de legere schole: Kinderen op 't land en De wijde, wijde Wereld. Mor het bekendste is hee eworden met Volksgeloof en Volksleven en Oud-Achterhoeksch Boerenleven (1927). Dee geldt ok no nog as standaardwark. Wieters hef hee studies ovver Willem Sluyter, Jan Luiken en Christiaan Andersen eschrevvene en veur toeristen gidsen ovver den Achterhook, Twente en de Veluwe. Nao zienen dood hef zienen vriend Hendrik Odink ne bundel met nao elaoten wark uut egovven, Uit de Achterhoek, schetsen van land en volk. In 1973 hef zien dochter D. Onstenk-Heuvel in Nagelaten werk nog een antal artikelen van eur vader biejnene ebracht.
Daornaost hebt der nog völle artikelen van Heuvel in kranten en tiedschriften estaone. Het archief van meister Heuvel bevundt zich in het Streekarchief in Deutekem.
Heuvel schreef in het Nederlands, mor de dialogen in ziene beschrievings van het boerenleaven bunt in het Achterhooks.
Uutgaonde verwiezing
[bewark | bronkode bewarken]| Bronnen / wellen: |
|