Kamera

Nen kamera is en optisk warktüüg üm sichtbåre bealden vaste te leggen. In beginsel is nen kamera en afslöätene döse (de sounöömde body) med en klein gaetken (diafragma). Lecht dat vanaf en underwarp afkaatset en döär dat gaetken kümt, valt up en lechtgevölig uppervlak (meysttyds fotografisken film of digitalen sensor). Kamera's hebbet meyrere mechaniken üm te regelen wodöänig as et lecht up et lechtgevölige uppervlak valt. Med lensen kan et lecht skarper en doffer emaked worden en dee oapening kan gröäter en kleiner emaked worden. Med nen sluter kan den kameragebruker bepålen wo lange as et lecht up lechtgevölige uppervlak valt.

In de fotografy is en eynbealdskamera et höyvdwarktüüg. De vastelegde bealden künnet later (digitaal) bewarked worden en afedrükked. Vergelykbåre artistike uutdrükkingen med beweagende bealden sint film, videografy en cinematografy.

Et woord kamera kümt van et latynske camera obscura (dunkeren kamer), wat verwist når et oorsprungelike apparaat wårmed en beald up en plat vlak projekteerd wördt. De hüdige kamera's stammet allemål van den oorsprungeliken camera obscura. De eyrste permanente foto wör in 1825 emaked döär Joseph Nicéphore Niépce.

Warking

Nen kamera vangt lechtfotonen, meystal uut et sichtbåre spektrum (mär möägelik ouk uut andere deylen vna et elektromagnetiske spektrum). Alle kamera's gebruket etselvde grundbeginsel: lecht kümt nen kleinen kamer in en brandt in en lechtgevölig medium. De längde van dee bloutstelling wördt beheyrd med nen sluter. In de meyste nyste kamera's sit ouk nen kykerd (viewfinder), wårmed as den fotograaf kan seen wat he der upkrigt en wårmed as hee synen lechtafdrük vöäraf kan bystellen.