Zuud-Tirool

Oet Wikipedie, de vraaie enzyklopedie
Gao naor: navigasie, zeuk
Ligging Zuud-Tirool

Zuud-Tirool (Duuts: Südtirol, Italiaansk: Alto Adige (officieel) of Sudtirolo; Ladinies: Südtirol) is t zudelike deel van de laandstreek Tirool en ok as Autonome proveensie Boozn-Zuud-Tirool (Duuts: Autonome Provinz Bozen-Südtirol, Italiaansk: Provinzia autonoma di Bolzano-Alto Adige, Ladinies: Provinzia Autonòma de Balsan-Südtirol) de meest noordelike autonome proveensie van Italiën, oonderdeel van de regio Trentino-Zuud-Tirool. t Gebeed hef 476.000 inwonners op ne öppervlakte van 7400 km². De heufdstad van de proveensie is Boozn.

Zuud-Tirool is dreetalig: t Duuts, t Italiaansk en t Ladinies hebt n officiële stoatus. t Ladinies wördt allean broekt in de daaln woar dizze Reto-Romaanse taal sprökn wördt. De bewegwiezering gebeurt vuurnamelik in t Duuts en Italiaansk.

De officiële ofkorting vuur de proveensie is BZ, ofleid van Boozn of Bolzano. Alhoowal de officiële naam van de proveensie Boozn-Zuud-Tirool is, wördt t in t dagelikse leavn altied Zuud-Tirool of de proveensie Boozn (Bolzano) nuumd. De officiële Italiaanske benaming vuur Zuud-Tirool is Alto Adige (letterlik "Hoge Adige"). Dizze naam oontstön an t begin van de 20e eeuw noar t vuurbeeld van de Fraanse departementn en verwiest noar de gelieknamige riviere Adige (Duuts: Etsch) die hier oontspringt. De oorsproonkelike Italiaanske naam is Sudtirolo, baseerd op de Duutse naam, die teagnswoordig ok weer broekt wördt.