Ruslaand-Duutsers

Oet Wikipedie, de vraaie enzyklopedie
Gao naor: navigasie, zeuk
Etniese Duutsers oet t Wolga-gebeed in n vluchtelingnkaamp in t Duutse Schneidemühl in 1920

Met Ruslaand-Duutsers (Duuts: Russlanddeutsche; Russies: Российские немцы, Rossijskie nemtsjie) of Wolga-Duutsers (Duuts: Wolgadeutsche, Russisch: Поволжские немцы, Povolzhskie nemtsjie) wordt Volksduutsers an eduudt dee in Ruslaand of de Sovjet-Unie wont of wont hebt. Rechtevoort wont öare noakommelingn in Ruslaand, Kazakstan, Duutslaand en de Verenigde Stoaten.

Tsarina Catharina de Grote van Ruslaand leut teegn t eande van t 18de joarhoonderd Duutse boern komn um de weuste groond kloar vuur laandbouw te maakn. Dit gebuurn wal vaker in de Oost-Europese geskiedenisse. Dr kömn dan ook Neerlaanders (mangs Mennonieten) met. Dee kömn vuur t grötste deel an de Wolga te wonn en warn geslötn en slim op zikzelf an eweezn. Doarduur bleef de (Plat)-Duutse kultuur good bewoard. De Ruslaand-Duutsers trouwn feaitelik nooit met de Rusn. Dr kömn wal baptistengemeentes duur zeandingswoark. hieroet is oonder mear t Broderskop van nit-registreerde baptistn ontstoan. Noa n Eerstn Wearldoorlog, oonder t diktatorskop van Stalin wördn de Ruslaand-Duutsers vervolgd. Dee sleugn op de vlucht en treukn heuwdzakelik noar Paraguay. Doar stichen ze oonder mear de kolonies Freeslaand, Voolndam, Menno, Neuland en Fernheim.

1924 wör n Wolga-Duutsen Reppubliek op ericht, met as heuwdstad Engels. In n Tweedn Wearldoorlog deporteern Stalin t hele volk (oonderwiel zo'n hoonderddoezend leu) noar Kazakstan, um at he bange was vuur verroad. In Kazakstan wördn de Ruslaand-Duutsers in kaampn ezat en slim oonderdrukt. Later meugn ze wierumme noar woer't ze vandan kömn, woernoa't de Ruslaand-Duutsers verspreaid raakn oawer n Sovjet-Unie. De Duutse kultuur wör aal mear verdrungn. Ze probeern nog wal um wier ne Wolga-Duutse Reppubliek te stichtn, mer det lukn nit.

Noa de Duutse eenwörding in 1990 kreeg elken Rus (dus ook de Ruslaand-Duutsers) den't an kon teunn at he Duuts blood har, t recht um terugge te komn noar Duutslaand. Heel völle hebt dit an enömn en zeent noar Duutslaand emigreerd, en probeert nog aait te wenn an de leawnsstiel van t hudige Duutslaand. Det geet nog nit zo makkelik; de Duutse bevolking en de Ruslaand-Duutsers maakt mekoar regelmoatig zwart. n Poar doezend Ruslaand-Duutsers zeent oonderwiel noar t Oblast Kaliningrad etrökn.


Zeet ook[bewark | bronkode bewarken]