Netuurkunde

Oet Wikipedie, de vraaie enzyklopedie
Gao naor: navigasie, zeuk
Een magneet die boven een hogetemperetuursupergeleider zweeft laot et Meissner-effekt zien.

Netuurkunde is de wetenschop van de meterie. D'r wodt ok wel zegd dat netuurkunde de niet-levende netuur bestudeert waorbi'j gien scheikundige veraanderings optreden. Et omvat onderzeuk van algemiene eigenschoppen van meterie, evenwicht en beweging, straoling, waarmte, locht, magnetisme, elektriciteit en de bouw van meterie tot op de kleinste schaolen. De netuurkunde koncentreerde et onderzeuk oorspronkelijk op de niet-levende netuur. De levende netuur wodt bestudeerd deur de biologie. Overigens bestaon bi'jgelieks ok biofysika, de netuurkunde van organismen, en fysische chemie. Methoden en technieken uut de netuurkunde bleken veerder op vule aandere wetenschopsgebieden toepasber te wezen.

Ofbaokening[bewark | bronkode bewarken]

De netuurkunde is een exakte wetenschop. Et het een bulte raekvlakken mit de meerste aandere exakte wetenschoppen.

Bi'jgelieks:

  • wiskunde. Dit is et belangriekste instrement om een verklaoring veur netuurkundige waornemings in een saemenhangende theorie te gieten. De mederne netuurkundige kan daoromme niet zonder wiskunde. Pattie dielgebieden van de netuurkunde zoas kosmologie en kwantummechanika hebben vule theorie neudig zodat de beoefenaers halve wiskundigen lieken. Heur theorieën bin over et algemien slim muuilik en leiden ok tot ni'je inzichten in de zuvere wiskunde zels. Ontdekkings in de iene discipline kunnen grote gevolgen hebben veur de aandere discipline.
  • scheikunde, waor keken wodt naor reakties tussen verschillende stoffen (fysische chemie).
  • biologie, die him veurnaemelik bezighoolt mit de levende wezens (biofysika, bioinformatika).
  • eerdwetenschoppen (geofysika), dat him bezighoolt mit percessen in et binnenste van de eerde.
  • steernskunde, die him bezighoolt mit verschiensels buten de eerdse dampkringe.
  • meteorologie en oceanografie, die him bezighollen mit verschiensels in de atmosfeer en oceanen.
  • informatika. Dit gebied ontston vanuut de netuurkunde en de wiskunde. Vule methoden in de informatika wodden ontwikkeld veur netuurkundige perblemen.
  • praktisch richte vakgebieden zoas de warktuugbouwkunde. De technische netuurkunde richt him op toepassings.